馬國明湯洛雯公開認愛 一文睇清娛樂圈仲有邊位男女筍盤!

大家心目中筍盤嘅條件係包括啲咩呢?有錢?孝順顧家?高學歷?馬國明與湯洛雯(靚湯)戀情喺上周五晚曝光,二人隨即喺社交網站高調認愛,更成為城中熱話,唔少藝人及網民都大讚佢哋郎才女貌,非常合襯,紛紛留言祝福佢哋。馬國明形象好又深得觀眾愛戴,一向被視為「鑽石筍盤」;而湯洛雯就有樣有家底,被網民封為「白富美」。男女神齊齊封盤,相信無意間令唔少粉絲心碎。其實娛樂圈都仲有唔少筍盤,不如宜家就同大家數一數娛樂圈嘅男女筍盤啦!

古天樂

古天樂係娛樂圈公認嘅筍盤,除咗有型同吸金能力強之外,佢仲孝順又善心,絕對係女士心目中嘅理想對象。古天樂出道多年嚟都只係傳過幾次緋聞,例如陳喬恩、陳妍希、鄭秀文及楊千嬅等等,不過公開承認嘅女朋友就只有黃紀瑩一個。

古天樂

陳家樂

33歲嘅陳家樂喺前年憑劇集《逆緣》「爺爺」鍾定國一角成功入屋兼爆紅,更加成為新一代男神。原本愛情事業兩得意嘅佢,喺前年中與拍拖近四年嘅女友余香凝分手,重返單身市場。佢有型靚仔、高大又專一,上年更以半億元購入何文田豪宅,榮升業主,呢啲筍盤真係買少見少㗎啦!

陳家樂

方力申

今年初踏入40歲嘅「飛魚王子」方力申,2000年入行後歌影視三棲發展,更經常與鄧麗欣(Stephy)情侶檔姿態搵真銀,所以早前傳出佢身家近億。除咗靚仔有米之後,佢仲好有善心,好似今年生日正日就選擇做善事,出心出力咁游咗香港環島泳45公里,最終以10小時43分06秒完成!至於感情方面,佢同拍拖10年嘅Stephy未能開花結果,喺2016年宣布分手。

方力申

黃宗澤

高大靚仔嘅黃宗澤(Bosco)一向異性緣都好好,自從與胡杏兒分手後,佢都不時與合作女星傳下緋聞,最新嘅就係陳嘉桓,不過仍然都係例牌否認戀情。另外,近年Bosco主力喺內地發展,賺到盆滿缽滿。近年愛上儲樓嘅佢,仲喺香港、內地及東南亞掃貨,淨係馬來西亞已經擁有四棟物業。另外,出名孝順嘅佢喺15年仲買咗個物業俾媽媽做母親節禮物。

黃宗澤

余德丞

30歲嘅余德丞(Dickson),靚仔有身材、性格暖男,屋企又有家底,家住2000萬跑馬地豪宅,及被爆出與家人共同擁有多個物業,真係人生勝利組呀!另外,Dickson近年亦被無綫力捧,無論係劇集定綜藝節目,大家都唔難見到佢嘅蹤影。

余德丞

趙希洛

37歲嘅趙希洛(Candice),07年香港小姐後入行,之後默默耕耘,多年嚟都係做配角居多,由於經常飾演癲婆角色,而且仲要演得入型入格,因此被封為「無線御用癲婆」,直至今年終憑《金宵大廈》奪得「最佳女配角」。佢媽媽係前無綫藝員梁小玲,爸爸就喺澳洲經營石油生意,所以佢嘅家庭背景都係外界焦點,不過佢作風非常低調,生活同普通人冇分別。

趙希洛

周秀娜

o靚模出身嘅周秀娜(娜姐),樣靚身材正,係唔少宅男心目中嘅女神。近年佢收起性感,轉型做演員及事業型女性。除咗幕前工作之外,佢仲有做自家內衣品牌。密密努力儲錢後,娜姐以1,600萬元購入西半山千呎豪宅俾父母住,真係名副其實嘅圈中小富婆。

周秀娜

佘詩曼

2011年離開無綫北上發展嘅佘詩曼,前年憑內地宮廷劇《延禧攻略》嫻妃一角爆紅,工作一個接一個。吸金力勁強嘅佢,被指半年就賺咗6千萬人民幣,仲持有4個物業,當中包括自住嘅西貢獨立屋,總值逾1.4億,認真犀利呀!事業就勁得意,不過愛情方面就唔係好順利,希望佢嘅白馬王子早日出現啦!

佘詩曼

唐詩詠

唐詩詠唔經唔覺已經入行20年,公開交往過嘅男友有3位,分別係余文樂、崔建邦及洪永城。多年嚟,佢都被外界封為「絕世好女友」,除咗因為樣子甜美之外,佢對另一半仲不離不棄。

唐詩詠

鄺潔楹

28歲嘅鄺潔楹(Judy)樣子清純又可愛,被網民封為「仙氣女神」。除咗有份拍攝電視劇及綜藝節目之外,更係廣告客戶嘅新寵兒,絕對係無綫上位小花之一。事業發展不俗嘅佢,其實家底亦相當豐厚,父母係家具商人,家住大埔二千呎獨立屋,仲同阿哥合資購入跑馬地逾千萬元嘅物業。

鄺潔楹