「香港小巨肺」譚芷昀搵錢能力驚人 傳飛外地20萬出騷價兼獲安排5星酒店

譚芷昀

現年12歲有「香港小巨肺」之稱嘅譚芷昀(Celine)小妹妹,三年前參加美國才藝節目《全美一叮》(America's Got Talent)表現一鳴驚人,成功贏得全球關注。雖然最後都未能躋身決賽,但工作量排到密密麻麻,細細個已經可以帶挈全家由北角舊樓,搬到千呎山頂豪宅,佢更入讀出名貴嘅山頂國際學校,搵錢能力真係唔簡單。

譚芷昀

早前Celine被發現又密密做,參與內地節目《巔峰之夜》,唱自己首創作歌曲《Who I am 》,評判之一嘅鄔君梅老師,激動爆燈,仲激讚佢「天賦過人」。雖然最後被淘汰,但人民幣就袋袋平安啦。之後Celine轉戰新加坡賺埋坡紙。有報道指聖誕節前佢已經同埋屋企人去新加坡參加《亞洲影藝創意大獎》,擔任表演嘉賓獻唱《How far I’ll go》,咁就賺咗20萬演出費,之後大會更安排五星酒店招待佢地一家四口,留喺當地豪玩豪食嘆返幾日。有人問到Celine妹妹細細個已經周圍飛會唔會影響學業㗎?爸爸Dr Steve就話Celine好鍾意讀書,成績都唔錯。

譚芷昀
譚芷昀
譚芷昀
譚芷昀