《李屍朝鮮2》將上架!數下香港有邊啲喪屍題材電影劇集

《李屍朝鮮2》劇照

近年越嚟越多以喪屍為題材嘅電影及劇集,好似由朱智勛、裴斗娜及柳承龍等人主演嘅Netflix首套原創韓劇《李屍朝鮮》,唔少人都被喪屍逼真嘅演出震撼到,劇集喺上年播出時深受觀眾嘅喜愛,叫好又叫座,而引頸期盼嘅《李屍朝鮮》第二季就將於星期五(13日)上架。其實唔係淨係得外國先有喪屍為題材嘅電影及劇集嘅,香港都係有㗎,不如而家就同大家重溫一下啦!

《生化壽屍》 1998年

《生化壽屍》由藝人陳小春、李燦森、張錦程、黎耀祥及湯盈盈等人主演,電影係cult片中的經典,劇情主要講述「無敵」(陳小春飾)和「喪B」(李璨森飾),令一位穿西裝男子飲下含生化物質飲品,之後佢隨即變成喪屍,佢哋將呢位男仔帶回商場,令商場一夜間陷入喪屍困獸鬥。

《生化特警之喪屍任務》 2000年

《生化特警之喪屍任務》由馮德倫及李燦森主演,講述實驗室喺進行實驗時遇著病毒變種,醫生進行抽血時,喪屍突然狂性大發大咬人,導致人傳人變為喪屍。而處決喪屍其中一個方法就係用槍射殺,所以當中射殺喪屍畫面加電影主角就被人話似《特警新人類》。

《屍城》 2014年

由安志杰、Jessica C、伍允龍及王敏德等人主演嘅《屍城》,劇情講述大衛(曾國祥飾)有日收到表哥喺外國寄嚟嘅毒品(名為浴鹽),竟然正正就係變種喪屍病毒。之後大衛成為變種喪屍源頭,令佢啲朋友變成喪屍。警察Andy(安志杰飾)拯救公寓內的住戶,期間仲遇到住客之一嘅Jenny(Jessica C.飾),佢哋搵機會逃出生天。除咗有唔少喪屍之外,電影仲加入咗格鬥及動作嘅元素,不過唔少網民就話電影有啲悶。

《今晚打喪屍》2017年

電影以香港作家余兒超人氣同名小說改編而成,一放映就已經有唔少評論。電影由年輕藝人白只、張繼聰、顏卓靈及王敏奕主演,劇情科幻得嚟有點超越時空情節,講述阿龍(白只飾)自己最愛動漫喪屍竟然出現喺城市中,仲將市民逐一變成喪屍!喺爆發喪屍病毒嘅情況下,張繼聰同白只就帶領眾人殺出重圍。

《金宵大廈》2019年

上年無綫熱播劇《金宵大廈》加入唔少奇幻及驚嚇元素,當中包括喪屍。喺單元「Simone」中,手機維修舖老闆膠罐(林子善飾)一直渴望拍拖,電話Simone話佢同藝人Kelly(張曦雯飾)好襯,仲製造機會俾膠罐同Kelly。佢哋認識後發覺有共同嗜好就係打機。更一同遊玩電腦虛擬遊戲《奇幻大廈》。當中二人以打WAR GAME造型示人,康華同趙希洛二人於遊戲《奇幻大廈》變為喪屍。

何廣沛

除咗以上電影及電視劇之外,無綫嚟緊會仲有由何廣沛、江嘉敏及陳曉華主演嘅新劇《食腦喪B》,三人合演一場人屍戀,不過何廣沛嘅造型就被指似電影《熱血喪男》(Warm Bodies)中嘅R。