食正疫情望梅止渴 周董旅遊真人騷《周遊記》3/21起飛

世衛正式宣佈新型冠狀病毒為「全球大流行」,未宣佈之前已經影響各行各業,特別係零售、餐飲及影視娛樂等,連荷里活都怕怕,拍緊嘅戲要停工、拍完嘅戲要改期,可謂損失慘重。不過似乎有部份影視公司可以置身事外,分分鐘業績仲好咗,講緊係一系列串流平台!

為免中招,唔少朋友選擇留在家中,安坐家中煲劇、煲戲成為近日熱門娛樂,你睇韓劇《愛的逼降》同《梨泰院Class》咁多人討論就知啦。串流平台龍頭Netflix一向注重亞洲市場,早過其他對手加入亞洲節目,最新搞作仲包括推出自家製,以周杰倫擔正嘅真人show節目《周遊記》!

周董唔駛瘋狂用奇裝異服、自資買入場券霸住國際影展條紅地毯搶曝光,早早就憑佢於華人地區超高人氣打入荷里活,於2011年《青峰俠》中擔正做男主角,套戲嘅票房成績仲幾好添。海外有知名度,亞洲華人地區幾乎無人唔識,Netflix搵周董拍節目,絕對有著數!

話哂平台觀眾接觸層面咁廣闊,周杰倫都好用心咁獻出自己金曲版權,節目將以旅遊節目、明星真人秀加訪談形式進行,強調「無劇本、無人物設定、無規則」(真係無劇本都幾考起剪接、導演功力!),展示周杰倫最真實嘅一面。每集《周遊記》都會配搭一首周氏金曲,用經典歌曲襯託澳洲黃金海岸、奧地利因斯布魯克、維也納、日本東京、台北、新加坡、深圳及法國巴黎等地,非常重本!

當然大家最關心佢同邊個一齊去旅行,佢御用化妝師杜國璋、魔術師陳冠霖,以及曾登上《全美一叮》嘅魔術師蔡威澤會係節目固定班底,同佢去足咁多個地方。而每個地方又會另請重量級嘉賓,包括蕭敬騰、JJ林俊傑、謝霆鋒等好兄弟,據聞連時裝大師山本耀司都會登場!

靚景、巨星、耳熟能詳嘅周氏情歌再加同班老友講爛gag去旅行,咁嘅組合絕對係男人終極浪漫!喺依家禁飛嘅日子,好適合用嚟望梅止渴。

節目一共12集,將於3月21日190個國家嘅Netflix平台首播。

click入去睇節目預告片