【頒獎典禮前哨戰】邊位被批評係今年演技差女主角三甲?

一年一度嘅《萬千星輝頒獎典禮》將會喺今個月16日舉行,早前公布咗各大獎項嘅入圍名單,隨即引起網民熱烈討論,網民喺網上都增設好多唔同嘅特別獎項。今日就想同大家講下網民認為邊三位獲提名「最佳女主角」嘅女演員演技較為另類,需要再磨練一下啦!

今年一共有18位女藝人獲提名「最佳女主角」,以下女演員就被網民批評係今年演技差嘅三甲人選。

周勵淇《再創世紀》飾演 卓定垚 Ella

周勵淇(Niki)已經好多年冇參演無綫劇集,今次喺劇中飾演香港四大首富個女Ella,仲與袁偉豪飾演情侶。雖然佢已經39歲,但喺劇中飾演天真爛漫嘅少女都冇違和感。唔少人都有大讚佢保養得宜,不過佢嘅演技就被網民批評,指佢「中學生話劇水準」、「完全不在狀態咁」、「樣keep到,演技一樣keep到無進步」及「睇佢做戲真辛苦」等等。好似當中就講到Ella兩個哥哥Gordon(陳少邦飾)及Melvin(楊鴻俊飾)因車禍去世,嗰場喊戲就俾網民話假到爆,以為睇緊喜劇,及爸爸卓啟堂(潘志文飾)心臟病發,佢嗰場戲完全喊唔出,想扮喊又唔成功。雖然Niki話角色後期先有得發揮,不過都係被一班網民批評雖然有樣睇但係演技差。

唐詩詠《棟仁的時光》飾演 程敏琦 Kris

唐詩詠今年初憑《不懂撒嬌的女人》爆冷獲得最佳女主角,當時已經有好多人覺得佢未夠資格,惹嚟唔少爭議。今年佢就憑《棟仁的時光》入圍最佳女主角,喺劇中飾演未婚夫失咗蹤嘅救護員Kris,同袁偉豪有唔少對手戲。唔少網民睇呢套劇嘅時候,已經話佢嘅演技未夠班做視后、做嚟做去都係同一個表情、一係木口木面一係皺住眉頭及講對白語調好悶等等。

麥明詩《是咁的,法官閣下》飾演 夏心寧 Helen

英國劍橋大學法律系畢業嘅麥明詩,喺劇中飾演新晉事務律師Helen,呢個角色好似為佢度身訂造咁。原本認為佢飾演呢個角色時會特別得心應手,不過可惜佢講對白同表情都好奇怪,講對白好似講到讀書一樣。就算係一場喊戲都俾唔到人一種真心喊,而係勉強嘅感覺,真係令人有想轉台嘅感覺。網民都留言話「講嘢口齒不清,根本聽不到對白講乜!好心去上吓堂學講嘢,做演員基本功喎」、「演技假到死!完全喺度讀台詞咁,無d感情」及「不如去當真律師」等等。今次入圍爭視后,連麥明詩自己都話覺得好尷尬,因為自己都覺得未夠資格。