音樂傳記片成風潮 今次係拍Michael Jackson!

奧斯卡得獎電影《波希米亞狂想曲:搖滾傳說》嘅金牌監製Graham KIng,再次挑戰音樂天王傳記片種,夥拍《娛樂大亨》、《新鐵金剛:智破天空城》編劇John Logan,將流行天王Michael Jackson一生搬上大銀幕!

電影將會講述Michael Jackson一生,由童星時代The Jackson Five講起,再到後來成為流行天王、全球巨星嘅歷程,而佢後期捲入性侵兒童訴訟及醜聞等事亦會於戲內出現。

Michael Jackson於流行音樂上嘅貢獻毋庸置疑,不過事業如日中天之際爆出性侵兒童指控,1994年被13歲男童指控性侵,最後要庭外和解。而05年再次被另一男童控告,雖然最後被判無罪,不過天王之名蒙上不少污點,加上其抱子女出露台等行為被傳媒大肆渲染,天王變成癲王,事業走向下坡!

2009年MJ本來打算東山再起舉行演唱會,本來係件矚目盛事,演唱會門票一早沽清,可惜誤服過量助眠藥物而不幸猝死。演唱會最後無成事,歌迷們只能欣賞佢排練花絮剪輯而成嘅Michael Jackson:This is it一睹佢最後風采。

Michael Jackson過身10年,不過有關佢嘅傳聞、醜聞仍然未有平息。年前紀錄片Leaving Neverland中,兩名男子憶述於90年代曾被Michael Jackson性侵,紀錄片一出,大眾再次聚焦於一連串與Michael Jackson有關嘅兒童性侵指控。雖然其仔女及90年代童星Maculary Culkin都發聲撐天王人格良好,指控並不真實,不過Michael人已離世,無法自辯,亦難以還原真相。

近年美國民眾最熱熾事事要政治正確,荷里活亦唔例外,Graham King明言呢套傳記電影唔會美化天王生平。但面對眾多性侵指控,點樣可以持平描述事件,對得住指控者而又唔會對Michael Jackson作出不公平審判?

仲有,邊個孭到飛演MJ,識跳識唱又要有演技,先演到天王嘅一體多面喎!