韓國藝人金義聖現身金鐘 身體力行撐示威者

金義聖

反修例風波持續已經三個幾月,唔少藝人都有為事件公開表態,當中包括韓國資深男演員金義聖。金義聖係首位公開表態韓國藝人,佢除咗多次喺網上公開支持香港市民及喺網上發起「#Eye4HK」活動支持香港人之外,喺噚日佢仲身體力行現身金鐘示威現場。

雖然噚日反修例集會和遊行遭警方發反對通知書,不過仍然有唔少市民自發上街。而金義聖與韓國攝影隊今次會嚟香港逗留三至四日,以主持身分為韓國調查報道節目《探查企劃 Straight》現身金鐘示威現場,同示威者交流、影相及嘗試以廣東話跟住唱《願榮光歸香港》。

喺接受傳媒訪問嘅時候,金義聖就話今次嚟香港係想親身感受真實嘅情況,同埋了解香港市民真正嘅想法。佢仲話示威非常和平,喺現場睇唔到暴力,認為只要警察唔用暴力攻擊市民嘅話,暴力就唔會出現。另外,佢亦表示睇到大批年輕人願意企出來,為咗爭取同捍衛香港嘅自由同未來發聲,佢覺得好感動。

金義聖IG Post