韓君婷蔡國威 秘密同居

東方日報
買咖啡期間,韓君婷不時望住蔡國威,兩人有講有笑,十分開心。

前亞姐韓君婷人生遭遇可謂相當坎坷,三年前決定回流香港做OL,重新開始。近年她與曾在亞視「同撈同煲」的蔡國威兩顆寂寞的心愈走愈近,日前更被發現齊齊睇傢俬再返歸,展開親密同居生活!

現年44歲、1997年亞姐冠軍韓君婷,情路相當崎嶇,初戀男友患肝癌離世,之後拍拖都是分手收場,更患上抑鬱與厭食症,加上曾於浴室滑倒仆崩鼻要做手術,外表受到一定影響,不時要面對指指點點。早年於新加坡生活的她,3年前決定回流香港,但因容貌問題未能在娛圈繼續發展,故轉行做醫學美容中心OL,據知月薪只有二萬多,要慳住生活,不過亦總算重新開始。可是前年六月,君婷母親因病離世,令她又變得低調,甚少公開露面,情況令人擔心,但原來她已找到可以依靠的人,正是現年46歲的「六合彩之子」蔡國威!

睇完傢俬 黑夜談心

二人識於微時,22年的友情始於亞視,及後威威過檔無綫擔任《六合彩》主持並演出不少劇集,發展不錯,現時《六合彩》因疫情暫停,令威威有更多時間陪伴君婷。二人關係要好,已是一班亞視舊同事之間的公開秘密,威威見證了君婷於情路上的起伏,如她幾乎要結婚的男友離世,以及近年君婷母親病逝,空虛的君婷亦很願意跟威威傾訴,訴說對象近年變成身邊的另一半,最近更索性共賦同居!

前晚,記者發現他倆在九龍城一間百貨店睇傢俬,之後轉去飲咖啡,期間似為傢俬討論得很雀躍,一度除下口罩,但君婷慎防近日病菌橫行,亦提醒威威戴番口罩較穩陣,表現細心,討論過後二人散步返歸。他們於黑夜談心就更加投入,過馬路都幾乎不懂停步,及後到了寓所樓下,君婷熟練地按密碼,威威就迎門而入,舉動合拍,然後齊齊上樓。

「我哋係一齊住」

對於被拍得與君婷齊齊返歸,威威昨日回應時有點愕然:「吓!乜影到咩?(你哋拍拖睇傢俬?)哦……屋企要搵個櫃,咪一齊睇囉!(影到你哋一齊返屋企喎?)我哋係一齊住……(咁你哋咩關係?)係好好好好嘅朋友囉!(住埋幾耐?)er……我都要尊重番女方,其他嘢唔多講啦!」至於君婷對於同居一事未有正面回覆,只說:「係呀……我哋係好朋友!」

韓君婷與蔡國威孖住出巡,原來已經一齊住!
睇傢俬有商有量。
返到寓所樓下,兩人齊齊入閘上樓。
韓君婷已經搵到「另一半」依靠!