【韓劇熱】有冇幻想破滅?藝人上載與真北韓軍官合照

《愛的迫降》劇照

由玄彬同孫藝珍主演嘅韓劇《愛的迫降》爆紅,劇情主要講述朝鮮半島南北兩地戀人之間嘅愛情,劇集超越當年《鬼怪》收視紀錄,成為韓劇新冠軍。除咗深受亞洲觀眾熱捧之外,連各地嘅藝人都因為依套劇而瘋狂煲劇。北韓對好多人嚟講的確係充滿神祕色彩,睇埋《愛的迫降》後更一度懷疑北韓軍人係咪個個都好似玄彬咁大隻靚仔。為免觀眾有太多誤會,洪永城、柳俊江同方健儀都幫我哋了解真正嘅北韓軍人。

洪永城

洪永城喺社交網站上載咗一張2015年到北韓拍攝旅遊節目時同當地軍人嘅合照,並留言「毒,我就無中,不過的確開始睇咗幾集愛的迫降,我知你知北韓嘅玄彬應該係咁嘅樣,因為我接觸過。而且如果要睇南北韓邊界嘅故仔,我推薦可以睇J S A安全地帶,故事寫實、透過一件又一件細微嘅事,去描述相隔一條警戒線天與地嘅分別,而個故事仲可以做到係推理,抵佢咁好睇。#在那遙遠的地方北韓 #2015」,向推介大家睇埋《JSA安全地帶》認識南北韓。

柳俊江

柳俊江就上載咗十年前佢喺平壤大劇院同北韓外交部出名嘅靚仔「北韓金城武」合照,更留言:「封韓令生效前,睇《愛的迫降》,忍唔住抄返十年前FB。攝於2009年10月,平壤大劇院。四日行程,全北韓最靚仔已經喺我隔離,你同我講北韓有玄彬?! 補充:當年同行行家提醒,佢係北韓外交部出名嘅靚仔,當年我稱佢為「北韓金城武」」

方健儀

而方健儀就上載理想同現實嘅北韓軍官,佢仲留言話:「理想 VS 現實?#有人話北韓軍官好靚仔#我未睇愛的迫降不理解#我去過北韓更加不理解#仲以為降係投降嗰個降#又或者係降頭嗰個降囉」

睇完幾張相,相信觀眾們都對現實嘅北韓軍官加深咗認識。