【面癱又如何】吸血仔Robert Pattinson 有望成為新一代蝙幅俠

Marvel 《復仇者聯盟》系列暫時告一段落,趁舖緊新路迎接下一個十年,佢嘅對手DC應該好好把握機會搶攻個市場!DC個頭其實開得幾好,2005年Christopher Nolan導演、Christian Bale主演嘅《蝙蝠俠-俠影之謎》質素非常高,幫超級英雄電影加返深度,有返哂故事劇情,簡直提升咗同型類型電影,足足早過Marvel宇宙首部曲《鋼鐵奇俠》3年!

可惜Christian Bale唔再做蝙幅俠,Nolan亦唔再拍同系列,結果Marvel越戰越勇時,DC近年成績強差人意,由《自殺特攻:超能暴隊》、《正義聯盟》、《蝙蝠俠對超人:正義曙光》等由票房到口碑都好一般,成班DC英雄好似越拍越星途黯淡,得《神奇女俠》同《水行俠》倖免。但呢2套嘅成功,好大程度因為cast啱人,Gal Gadot同Jason Momoa極有觀眾緣,2位求其企喺度都有大把人睇,但係個電影劇本薄弱到不敢恭維。
總之,成件事搞到好「亞視」,被大台㩒住砌!

唔知係咪因為效果太令人失望,所以連Ben Afflect都辭演蝙蝠俠,即係電影公司要重新相過新一代人選!暫時呼聲最高有《吸血新世紀》走紅嘅Robert Pattinson同《變種特攻》系列嘅Nicholas Hoult,2位都係英國型男,大片同文藝片都拍過唔少。不過根據外媒透露,似乎Robert Pattinson睇高一線。

新版會係蝙蝠俠個人電影,預計2021年上映,可能想同Ben Afflect版作出分野,所以今次電影公司揀返個後生啲嘅演員嚟做蝙幅俠,仲搵埋《猿人爭霸戰》系列導演Matt Reeves執導。

對於Robert Pattinson即將成為新版蝙蝠俠,網友反應好兩極!因為佢喺《吸血新世紀》嘅角色實在太深入民心,所以鍾意嘅人就覺得Robert靚仔有型又有幾分神秘,由佢做蝙蝠俠好吸引;另一邊就記住佢喺《吸》用面癱表情配上白面look講啲超肉麻對白嘅Edward,由吸血鬼變蝙蝠俠,其實有少少關聯又幾好笑,但就代入唔到囉!

其實Robert除咗《吸血新世紀》外仲拍咗唔少art house片,好似《命中有罪》同《Life》等,唔止得個樣!如果成事,今年33歲嘅佢,將會係繼Christian Bale(31歲做蝙蝠俠)後最年青嘅蝙蝠俠!

但係依家咁樣reboot過,《正義聯盟》續集要推到幾時先有得睇?