靚湯回歸喇!湯洛雯減磅兩個半月搣甩肥肉

肥湯變番靚湯喇!

無綫小花湯洛雯體重反覆,時瘦時肥,靚湯變肥湯!今年中佢就被東網影到着透視裝現出三截「米芝蓮肥肉」,虎背熊腰走晒樣(相關新聞: https://bit.ly/2KCkgpo ),但最近佢已經減磅成功,fit番好多,「靚湯」回歸喇!

佢喺社交網同網民分享減肥心得,透露已經減咗兩個半月,用咗好多方法,因為新陳代謝已經冇以前咁快喇!佢話冇特定嘅餐單,但會計番自己嘅BMI跟番自己每日所需嘅卡路里食,絕對唔可以食少過,笑言:「譬如話一日我可以食1300卡路里,咁我可以淨係食零食食足1300卡路里都得,咁當然唔係日日都係咁啦!」又謂好多人會同佢食清啲戒鹽戒油戒糖,但佢覺得好磨蝕意志力,所以要搵一個自己可以持之以恒嘅方法!

除咗食,當然要做運動啦,佢坦承係「懶人之中嘅極品」,但係經過今次減肥歷程佢發覺做運動係必須!為咗搣甩肥肉,靚湯仲去按摩通淋巴做機,無所不用其極,最後佢就話呢啲都係佢嘅經驗,唔係專業,只供參考,最後佢就鼓勵大家:「不過都係嗰句,減肥唔係一朝一夕嘅事,需要持之以恒,希望大家鍛煉到willpower,搵番一個健康靚靚嘅體魄啦!」