霆鋒「劈友」爆腳見骨

東方日報
謝霆鋒上節目受訪時,大談拚搏拍戲的往事。

謝霆鋒拍戲從來不錫身,拍第一部電影已經搞到踢爆腳入院!他亮相ViuTV的《鋒味前奏》時,談到17歲接拍首部電影《新古惑仔之少年激鬥篇》,拍攝一場「劈友」戲最為難忘:「同劉偉強傾傾吓偈,突然間發現我對白飯魚,成對都係紅色,一拎出嚟半隻鞋係血,原來腳眼爆開咗!」

想自己縫針

當時導演即刻叫停,着他入醫院,自認年少氣盛的霆鋒說:「我有責任感嘅,話冇事繼續拍,仲叫人幫我洗傷口!嗰位工作人員喺地下執咗隻拖鞋叫我咬住,我想嗌唔好,佢即刻兜頭就冚咗我一巴,話:『咬住佢!』洗完傷口就見到白色嘅骨,跟住用大力膠布紮實大髀止血,然後繼續拍打戲,五個零鐘之後先去醫院。」

去到醫院,霆鋒指縫針前醫生跟他說:「同你縫針,唔代表你身體冇破傷風菌,如果有,我哋要幫你斬咗隻腳,或者會有人命嘅危險。」當縫到最尾一針,霆鋒想試自己縫針,醫生即說:「唉!真係冇得救呀你!」

霆鋒(中)17歲拍《古惑仔》時揸刀劈友。