【電影LOL】韓片暑假喪屍熱 朴信惠劉亞仁拎自拍棍救自己!

今個夏天,南韓電影將會由喪屍片雄霸票房?

相信最令觀眾期待嘅係《屍殺列車》續集《屍殺半島》,電影無原班人馬,改為姜棟元主演,講述《屍殺列車》4年後嘅世界,唔駛講疫情一定蔓延開去,成個世界七國咁亂,而男主角作為倖存者於亂世繼續發國難財,續集嘅喪屍亦進化咗,行動更快殺傷力更大。而姜棟元應該喺對付喪屍期間良心發現,利用自己嘅能力幫返其他弱勢倖存者。

《屍殺半島》將定於7月上映,而同期韓國仲有另一套由最年輕青龍影帝《燒失樂園》劉亞仁,聯同新一代韓劇女王朴信惠主演嘅驚慄片Alive。電影改編美國電影Alone,導演趙日亨聯同原版編劇Matt Naylor改編成韓國版故事,講述一日之間社區出現大規模但病因不詳嘅感染,變成喪屍社區。獨自生活嘅俊宇(劉亞仁 飾)未受感染,被困家中嘅佢要制止家園被喪屍入侵以保命;另一邊廂佢因為無wifi、無線路接駁兼無電話訊號,與外界失聯,無法向外求救,又無辦法得知外面情況。

同佢一樣無變喪屍嘅仲有住對面樓嘅宥彬(朴信惠 飾),喪屍圍困下搵到同伴分外可貴,長困在家開始斷水斷糧,為咗生存,兩人出盡力求援。男嘅為咗上網出post搵其他倖存者兼求救,攞住自拍棍爬出屋外!女嘅善用自己爬山知識,高空攀繩移動!最後2人到底可唔可以逃出生天呢?

劉亞仁、朴信惠日前於首爾出席電影記招,受訪時提到希望大家唔好當係喪屍片咁睇,Alive入面係受感染嘅人群,唔一定係喪屍,而且電影更著重描述人於生命受威脅嘅情況下如何求存,特別係現代人依賴互聯網、智能電話度日,無哂呢啲科技產品時自然會激發另一種求存本能,好似戲中宥彬會以游繩、槌仔等物件自衛,而俊宇就用返佢最常用嘅自拍棍同腳架!

雖然唔想你當喪屍片咁睇,不過戲內一樣有唔少追逐狂跑打喪屍等動作場面,全部由劉亞仁、朴信惠親自上陣,其中唔少用游繩攀爬鏡頭,朴信惠一樣應付有餘,用冰槌打喪屍下下有力,非常有型!拍完Alive之後,朴仲話斧頭、冰鑿同繩會係佢嘅求生三寶,而劉亞仁則㨂咗即食麵、水同繩做佢嘅求生錦囊!

男女主角喺韓國都係影帝視后級數,又一樣都好早出道拍戲,互相惺惺相識不過要直到今次Alive先首次合作!男神女神合作可唔可以於喪屍疫情中帶到新意俾觀眾,就要睇有無香港片商買片啦!

更多電影文章

【電影LOL】特效片有數返 片廠搵Ryan Gosling拍狼人傳搏一搏

【電影LOL】湯告魯斯密謀坐SpaceX上太空拍戲 爭做荷里活升空第一人

【電影LOL.煲劇部】「犯法就係犯法」《時效警察》專查無得問責過期舊案

【電影LOL】今個星期睇咩戲 《叔.叔》《墮落花》《誠實選舉媽》《罪惡島》

【電影LOL】韓劇最強綠葉擔正喜劇片《誠實選舉媽》寸爆無恥政客