【電影LOL】荷里活又拍戴安娜生平事蹟 Kristen Stewart孭飛面癱演技被質疑

年年都有唔少名人傳記片登場,由邱吉爾、霍金到茱迪嘉蘭,範圍由政治、科學橫跨至娛樂名人,總之係名人都有機會成為電影主角,無他嘅!有真人做對比,容易評價演員係咪形神俱似,總之越似越有演技,越大機會贏奧斯卡!

主人翁知名度越大,電影越易賣,但同一個人生平拍完又拍點先拍得出新意?故事以真人真事改編,不過更多時候似全創作,有時睇呢啲傳記片都有啲似睇大台廿幾年前套《娛樂插班生》!

世界其中一位最美麗嘅名女人戴安娜王妃,事蹟將再次被搬上大銀幕!電影以戴安娜婚前姓氏Spencer為名,將會聚焦於1990年代初期,戴妃決定同查理斯王子離婚後3日,當中嘅心路歷程!Spencer將由《第一夫人:積琪蓮甘迺迪》智利導演Pablo Larrain執導,搵嚟形象由乖乖女變成不羈反叛兼公開自己雙性戀性向、憑《吸血新世紀》走紅嘅Kristen Stewart飾演!

消息一出,網友嘩然,主要覺得Kristen形象同戴妃高貴氣質不符,又有網民覺得Kristen面癱演技未能勝任!其實Kristen Stewart拍完《吸血新世紀》系列之後,為咗不被定型,嘗試多類型作品,由動作喜劇《神探俏嬌娃》、科幻驚慄《深海異獸》到文藝片《坐看雲起時》都接,演技絕對唔止得一號表情咁片面。

雖然形象唔似,不過導演Larrain睇到Kristen同戴安娜嘅共通點︰戴安娜生前因為皇室身份受狗仔隊偷拍及小報追訪困擾,舉手投足都被放大消費;而Kristen走紅後被要求以《吸血新世紀》嘅Bella形象示人,戀情做哂娛樂版頭條,成為觀眾茶餘飯後嘅話題,兩人同樣面對閃光燈同民眾嘅壓力,致力擺脫枷鎖、做自己嘅掙扎!

拍名人都唔一定叫好叫座,好似2013年德國導演Oliver Hirscbiegel執導、以戴妃與心臟科醫生Dr Khan嘅戀情拍成電影《戴安娜》,主演嘅Naomi Watts由衣著到神情都學足戴安娜,不過套戲評價麻麻,特別係最熱愛皇室八卦嘅英國觀眾都覺得套戲情節唔真確,所以扮相似一似,都同各項電影大獎無緣!

由Kristen Stewart飾演嘅戴安娜,英國觀眾又會唔會受落呢?

更多電影文章

【電影LOL】今個星期睇咩戲《1/2的魔法》《熟女愛漫遊》《遺產繼承人》《希特拉偷走我的粉紅兔》《日間演奏散場時》

【電影LOL.外語930】Pixar動畫大人化序章《玩轉腦朋友》

【電影LOL】樣衰笑匠Will Ferrell 新戲扮冰島band友搞邊科?

【電影LOL】下年奧斯卡延期4月舉行 《潛行凶間》大導新作暑假面世救市

【電影LOL】畢彼特新片 華裔女星爭演荷里活傳奇女星黃柳霜