【電影LOL】泰片《無痛斷捨離》 丟得走信物 丟唔丟到段回憶?

呢期留喺屋企,執屋係最好嘅消磨時間方法。上年Netflix高收視節目Tidying Up With Marie Kondo,令源自日本嘅「斷捨離」文化輸出到西方國家,唔少人效法但係又學唔足,有人掉完嘢先發現連生活所需都「斷捨離」咗,結果仲嘥錢!

Marie Kondo嘅空間整理概念,在於掉走唔再令自己怦然心動嘅身外物。咁……唔再怦然心動嘅,係過去一段感情,真係掉入垃圾桶,人生就會變得簡約?

近期上演嘅泰片《無痛斷捨離》,就係帶觀眾由空間整理,反思到點樣整理過去,先至令自己有成長嘅空間。

設計師阿靜(Aokbab 飾)受風靡新世代嘅簡約風影響,決心打造空間感十足嘅家居。喺大掃除期間,阿靜對多樣舊物以及佢地所封存嘅回憶都隨意捨棄,只有前男友(Sunny 飾)遺下嘅舊相機令佢份外揪心。阿靜對自己當年不辭而別耿耿於懷,決定親手將相機歸還俾前男友,等自己有機會彌補遺憾,但重整人生不如重整家居,原來唯獨感情難以輕言斷捨離⋯⋯

《無痛斷捨離》的攝影、美術以至人物造型,都呈現濃濃嘅文青味道,貫徹導演華普譚容格坦拿列(Nawapol Thamrongrattanarit)前作《戀愛病發》嘅風格。導演亦起用《戀愛病發》嘅男主角Sunny,飾演片中「被斷捨離」嘅前男友。至於女主角一眼就認出係《出貓特攻隊》嘅高材生Aokbab。


《無痛斷捨離》早前入選鹿特丹國際電影節,並於剛過去的大阪亞洲電影節贏得「最優秀作品獎」,但因新型肺炎疫情持續,電影台前幕後代表以安全理由無去到大阪出席。套戲喺香港嘅映期亦都遇著疫情,希望好片有好報!


更多電影文章

寸爆政圈兼食正肺炎話題《逃出立法院》打爆喪屍政客光復議會

法國疫情失控 康城影展改期 參展片難創《上流寄生族》奇蹟?

【外語930】而家睇夠應景《地球末日戰》一早話源頭係……