【電影LOL】樣衰笑匠Will Ferrell 新戲扮冰島band友搞邊科?

美國笑匠Will Ferrell其貌不揚,雖然美國本土受歡迎作品甚多,可惜喺香港無咩觀眾緣,佢主演嘅戲絕少喺香港上映,比較多喺電影台播放。自從串流平台興起,睇返好多無上過大銀幕嘅電影,其實Will Ferrell部份作品都幾好笑!佢最新嘅喜劇《歐洲歌唱大賽:火焰傳說》即將於Netflix首映,今次佢身兼製作人、編劇同男主角多重角色,拍住Rachel McAdams齊齊組band參加音樂大賽!

電影講述Lars (Will Ferrell飾)與Sigrit(Rachel McAdams飾)為2人樂隊,熱愛音樂可惜歌藝不精嘅佢地平時於地區小pub開唱都被人柴台,不過竟然俾佢地得到代表冰島參加歐洲歌唱大賽嘅機會!於無人睇好嘅情況下,佢地為咗歌唱夢可以去到幾盡?

講開歌唱比賽,美國有《全美一叮》或者American Idol,其實《歐洲歌唱大賽》規模更大,出過ABBA同Celine Dion等冠軍人馬!比賽自1956年開始舉辦,參賽國家派出一位歌手或者一組樂團演唱一首自選歌曲,由觀眾投票選出最喜愛歌手,冠軍所代表嘅國家仲會成為下年比賽主辦國,所以賽事極受歐洲觀眾歡迎,直頭係全民節目,因為收視率超高,所以參賽者嘅表演亦非常華麗!

Will Ferrell同Rachel McAdams於戲內都有唔少浮誇演出,又要吊高、又要跑住演唱,上台前仲要裝假狗扮走光增加話題,當然仲有唔少chok爆造型!呢個美女與野獸嘅組合仲會發展感情線,Rachel因為比賽日對夜對,對出感情正想主動獻吻,竟然被Will以band友拍拖實無好下場為由拒絕!

其中一個笑點應該係由型佬占士邦Pierce Brosnan做Will Ferrell老豆,橫睇掂睇Will Ferrell都睇落老啲!另外仲有多個名人客串,好似有好唱得嘅小天后Demi Lovato、英國名嘴Graham Norton以及一眾歐洲歌唱大賽嘅參賽者都會於戲內現身!

當然電影《歐洲歌唱大賽:火焰傳說》最有趣嘅地方,一定係由無份參加歐洲歌唱大賽嘅美國人扮冰島人參賽,依家樣樣都要政治正確,電影26日上架後,唔知又會唔會引嚟抨擊,指責佢地大美國主義,唔cast返當地星做主角,又拍到冰島人老老土土?

更多電影文章

【電影LOL】下年奧斯卡延期4月舉行 《潛行凶間》大導新作暑假面世救市

【電影LOL】畢彼特新片 華裔女星爭演荷里活傳奇女星黃柳霜

【電影LOL.地道本周影院】20年後一樣塞 《屯門睡的文化》

【電影LOL】今個星期睇咩戲《金都》《睇你幾時死》《嚇鬼女朋友》《人工戀愛情式》

【電影LOL】事業愛情皆得意 奇洛李維斯轉性拍喜劇演騎呢中坑band友