【電影LOL】康城影展有入圍冇獎頒 香港7大導作品《七人樂隊》入選

每年5月舉行嘅康城影展絕對係世界影壇盛事,全球電影人集結法國康城為新片造勢,年年都有大量影星及導演出席,幫作品宣傳造勢。亦因為影展全球矚目,所以近年吸引咗大量中國大媽用錢買康城影展行紅地氈嘅機會,搏曝光出力打扮嘅奇人異士,為影迷提供電影以外嘅娛樂!

可惜今年無騎呢大媽亦無影展可睇!今年3月康城影展就新冠病毒流行宣布延期,無奈近日疫情仍未受控,影展一向強調大銀幕觀影體驗,所以線上放映不在考慮之列,最後決定取消影展活動!

考慮到各地電影人嘅付出及努力,大會取消競賽、一種關注等單元,改為公布官方評選共56部電影名單,入圍電影可以用「第73屆康城影展」宣傳及參加其他國際影展。

56部入選影片當中,最受矚目一定要數7月上映嘅南韓電影《屍殺列車》續集《屍殺半島》;由Wes Anderson執導、Tilda Swinton、Timothee Chalamet、Saoirse Ronan主演嘅《法蘭西諸事週報》(The French Dispatch)、迪士尼彼思嘅《靈魂奇遇記》(Soul) 以及宮崎吾朗執導嘅日本動畫 Aya to Majo。

香港方面都有代表,由7位大導演林嶺東、杜琪峯、譚家明、許鞍華、徐克、洪金寶、袁和平聯手執導的港產片《七人樂隊》入選。電影由50年代拍到未來,每位導演各自負責一個年代一個故事,而且《七人樂隊》全片以菲林拍攝,有數碼無法取代嘅質感!

今屆評審團主席Spike Lee本來有新作Da 5 Bloods以非競賽形式參展,電影由Netflix出品,係呢個串流平台龍頭久違3年再次參展作品。不過電影不在56套評選名單內,暫時未知會否改期至下年參展,或直接於Netflix上首映。

雖然今屆無實體放映,影展總監Thierry Frémaux表示為支持國際電影產業,將電影市場改為線上舉行。部份業界人士今年人不在康城,但仍然忙碌處理買片賣片工作中。

經此一「疫」,相信可見將來影展及電影放映形式應該有重大改變。

更多電影文章

【電影LOL】荷里活又拍戴安娜生平事蹟 Kristen Stewart孭飛面癱演技被質疑

【電影LOL】今個星期睇咩戲《1/2的魔法》《熟女愛漫遊》《遺產繼承人》《希特拉偷走我的粉紅兔》《日間演奏散場時》

【電影LOL.外語930】Pixar動畫大人化序章《玩轉腦朋友》

【電影LOL】樣衰笑匠Will Ferrell 新戲扮冰島band友搞邊科?

【電影LOL】下年奧斯卡延期4月舉行 《潛行凶間》大導新作暑假面世救市