【電影LOL.外語930】時光這個壞人《我的父親母親》

時間向前行,但人總愛往後看,點解?因為向前﹐不代表好。

1年前,你會唔會諗到,今日會過緊咁樣嘅生活︰口罩隨身、話題係「走唔走」、食餐飯要分枱坐……

再數前啲,20年前丫不如?紐約世貿大廈仍在、手機係用嚟通話同sms、冇人知咩係「沙士」、電視仲係大部份人嘅娛樂。

仲有,20年前嘅章子怡帶來嘅震撼。

1999年,張藝謀嘅作品《我的父親母親》,起用中央戲劇學院二年級女生章子怡擔任女主角 - 當時《卧虎藏龍》仲未開拍,冇人知呢位女生乜頭乜路。然而,《我的父親母親》嘅戲份,基本上係女主角招娣由頭帶到尾。

生子(孫紅雷飾)喺父親過世時回鄉奔喪,聽住媽媽招娣遙想當年嘅愛情故事。上世紀60年代,招娣係農村大美人,愛上到村校教學嘅年青教師長余(鄭昊飾),特意為心愛的人做最好嘅午餐、兜路挑水只為聽到佢嘅讀書聲。暗戀,都係做嗰啲嘢架啦。

然後,招娣同長余終於交往,但係遇著文革,長余被帶走。招娣抱病出城尋找愛人,但在半路昏倒,長余之後聞訊偷偷回村相見,結果再被帶走,亦令佢地要等多幾年先可以再見。自此,招娣同長余長相廝守40年,長余再無離開過招娣半步。

《我的父親母親》呢類舊時代農村故事,係張藝謀手到拿來嘅類型,比起《紅高粱》、《菊豆》等成名作,明顯見到張藝謀以簡約清新手法處理《我的父親母親》。片中有唔少農村少女暗戀心上人嘅細節描述,章子怡嘅任務既簡單又高難度︰清新可愛但又唔能夠唔靚、交到戲但又不能太老練、對愛情堅持但唔可以硬橋硬馬。二十出頭嘅章子怡通通做到,我仲記得睇完《我的父親母親》行出戲院,都有好幾個鐘頭當咗招娣係女神……

好嘞,時間向前走,章子怡因為《我的父親母親》嶄露頭角,下一部戲已經係《卧虎藏龍》,再下一套就係西片Rush Hour 2,亦即係被拍到喺片場同成龍「食生果」嗰套。而擔演張藝謀電影女主角嘅新人,開始得到娛樂版記者冠以「謀女郎」稱號。張導之後拍咗好多畫面好華麗嘅華語片,事隔多年再拍關於文革題材嘅作品《一秒鐘》,上年獲邀參與柏林影展,後來因為「技術原因」而退出,你懂的。

 

而今時今日男女之間嘅愛情,《我的父親母親》當中嘅「暗戀」同「守候」情懷已經失傳多時,最緊要快,一上的士就要熱情如火。


《我的父親母親》

VIU TV ch.99 星期六晚9點半播映

更多電影文章

【電影LOL】今個星期睇咩戲《打噴嚏》《超能復仇》《無定向喪心老友記》《築夢奇蹟》

【電影LOL】《屍殺列車》續集《屍殺半島》下周上畫 5個你要知嘅重要訊息

【電影LOL】《末日先鋒:戰甲飛車》拍前傳 影后主角被飛起 因為扮唔到20歲女?

【電影LOL】0成本勇奪全美票房冠軍 呢套Unsubscribe原來係咁拍!

【電影LOL】《幻愛》 談一場疑幻似真嘅愛情