【電影LOL.外語930】抽水亂入玩膠始祖 真.喜劇之王《搞笑驚魂》

 

大熱天時,加上疫情,已經慣咗匿喺屋企打開串流平台搵片睇。

新劇新戲睇晒嘞,自然會回帶。早幾日竟然俾我搵返兒時回憶 - 一套明珠台播過好幾次嘅荷里活喜劇《搞笑驚魂》(Airplane!)。

呢個欄目叫得「外語930」,就知係向「明珠930」致敬。八九十年代,美劇仲係好本土口味,香港人亦唔係幾識欣賞,所以好少可會好似而家咁播劇集。當時夜晚9點半嘅時段,明珠台都會播套西片。嗰時我仲係小學雞,阿爸阿媽好少可批准睇完「明珠930」搞到十一點幾先瞓。當日見到《搞笑驚魂》嘅宣傳片覺得吸引,自己轉台睇,居然冇人阻止,甚至成家嘻嘻哈哈睇晒。

廿幾年冇睇,再睇《搞笑驚魂》以為只係求個童年回憶,點知竟然笑得出,甚至人大咗,睇得明嘅英文gag位多咗,更加顯得呢套戲經典。

故事好簡單︰客機起飛後,乘客同機組人員都因為食物中毒不適。機上唯一有飛行經驗嘅,就係為咗同空姐女友Elaine箍煲而跟埋上機嘅退伍空軍Ted。過去因為行動失敗而有創傷後遺嘅Ted,重拾信心坐上機師位置,救返成機人。

一套電影係咪經典,最老生常談嘅講法係「幾時睇都覺得好睇」。對喜劇而言,呢個定義就變成「幾時睇都覺得好笑」,難度立即幾何級數上升,因為當時幾好笑嘅gag,流行咗講多咗就會唔好笑;而且唔同年代觀眾笑點位置唔同,要編劇諗埋「呢個位20年後啲人都會覺得好笑」就太強人所難啦啩。

奇就奇在,而家睇《搞笑驚魂》係搵得返而家喺youtube同facebook睇到嘅短片最常用嗰幾招︰

亂入 - 搵NBA湖人隊球星渣巴(即係同李小龍拍《死亡遊戲》對打嗰位)演飛機師,戲中佢極力否認自己係渣巴,但係下身著住條湖人波褲。

抽水 - Elaine 同Ted邂逅嘅一幕,跳足成首Stayin’ Alive,擺明向《周末狂熱》(Saturday Night Fever)「致敬」。

膠gag - 太多。開場嘅機場廣播已經好癲。仲有自動導航、報紙檔啲咸書……

原來1980年上畫嘅《搞笑驚魂》,喺2007年英國Channel4票選史上最強喜劇中排第2;2012年獲Empire選為「最好笑喜劇50強」嘅冠軍,2010年被美國國家電影保育局指定喺美國國會圖書館保存嘅電影。

假如荷里活黑白片嘅「喜劇之王」係查理嘅《摩登時代》,咁《搞笑驚魂》都可算係荷里活彩色電影嘅「喜劇之王」。

之但係套戲有極多政治不正確嘅笑位,呢期連《亂世佳人》都因為被指故事忽略當時嘅黑奴制求而要下架,如果要揪《搞笑驚魂》出嚟鞭屍,怕且幾難走得甩。

更多電影文章

【電影LOL】今個星期睇咩戲《死因無可疑》《我老細係天后》《福島50死士》《劇場版 角落小夥伴》

【電影LOL】康城影展有入圍冇獎頒 香港7大導作品《七人樂隊》入選

【電影LOL】荷里活又拍戴安娜生平事蹟 Kristen Stewart孭飛面癱演技被質疑

【電影LOL】樣衰笑匠Will Ferrell 新戲扮冰島band友搞邊科?

【電影LOL】下年奧斯卡延期4月舉行 《潛行凶間》大導新作暑假面世救市