【電影LOL.地道本周影院】20年後一樣塞 《屯門睡的文化》

你身邊一定有個住屯門元朗天水圍嘅朋友同事或者同學,你亦知道佢地嘅生活節奏,好大程度受交通狀況影響。呢兩日朝早屯門公路又塞車啦,即使有西鐵都冇用,因為個個都湧去搭!

今日要介紹嘅戲,嚴格嚟講唔係電影,而係一套2000年拍攝嘅港產紀錄短片《屯門睡的文化》。導演羅秀珊睇落同一個平凡屯門居民冇咩分別,不過喺20年前,手機仲未有拍攝功能嘅年代,羅秀珊已經拎住社區中心借嚟嘅攝錄機周圍拍。當時羅秀珊搬入屯門10年,發覺自己喺出入市區嘅車程上成日「中」眼瞓,於是有個念頭,就係拍一條紀錄片講屯門人長途跋涉返工放工、上車就瞓嘅「睡的文化」。

《屯門睡的文化》紀錄咗屯門人天未光就起身返工等巴士,放工天都黑齊都仲喺途上嘅畫面,最特別係影低好多乘客「釣魚」嘅鏡頭,就連羅秀珊自己瞓著嘅鏡頭都有!

《屯門睡的文化》並冇好犀利嘅影像,或者一語中的嘅旁白,甚至可以話成條片都幾粗糙,攝影、收音、剪接等等都好業餘水平。得罪講句,而家啲學生拍嘅嘢都可能仲似模似樣。不過,因為呢個咁獨特嘅題材同觀察,展現出城市規劃、交通安排、跨區就業甚至學童管教等等社區問題,正正展現出紀錄片嘅功能,所以《屯門睡的文化》喺2001年「香港獨立短片及錄像比賽」(IFVA)中,奪得公開組優異獎及最佳紀錄短片2項殊榮。


《屯門睡的文化》呢套紀錄片原來都20年歷史,羅秀珊接受訪問時話他日交通有改善的話,呢種「睡的文化」會變成歷史。但係20年過後,多咗西鐵,屯門公路又擴闊咗,不過一有撞車就塞死晒嘅情況,點解仲未有辦法解決?住「大西北」嘅你,仲係咪一上車就瞓著,秉承呢種「屯門睡的文化」?

上網睇片︰https://www.youtube.com/watch?v=2wlXz8XTVFI&t=469s

更多電影文章

【電影LOL】今個星期睇咩戲《金都》《睇你幾時死》《嚇鬼女朋友》《人工戀愛情式》

【電影LOL】事業愛情皆得意 奇洛李維斯轉性拍喜劇演騎呢中坑band友

【電影LOL】陳沖拍女排名將郎平紀錄片 國際上映前抽起 為咗賺人仔?

【電影LOL】《死因無可疑》林嘉欣自製殘樣綁腳演可疑婦人

【電影LOL.外語930】《寫出友共鳴》認識種族歧視入門課