【電影LOL】下年奧斯卡延期4月舉行 《潛行凶間》大導新作暑假面世救市

全球電影業因為新型肺炎而受重創,多部電影上映無期,疫情相當嚴重嘅美國,不但影視作品拍攝要停工,連戲院都要暫停營業,幾個月無開門,有傳大型連鎖院線頂唔順,要賣盤咁滯!唔少荷里活電影因為要延期上映,少則幾個月,多則推後1年先上映!

隨住疫情緩和,北美地區戲院有望於今個暑假全面重開,打頭陣救市嘅一定係《潛行凶間》、《蝙蝠俠︰黑夜之神》導演Christopher Nolan新作Tenet!

其實屆時有幾多地區嘅戲院可以開門做生意、又有幾多觀眾會放心入場都仲係個謎,荷里活片廠為咗確保票房收入,所以寧願將旗下「金蛋級」巨片延期到秋季或之後上映,何解用好多億元拍攝嘅Tenet,會咁勇選擇只係比原定片期遲2周嘅7月底上映?

據報因為一向鍾情大銀幕觀影體驗嘅Christopher Nolan,有見戲院業因為疫情大受打擊,所以希望借新作吸引觀眾入場幫手救市,為行業出一分力!站於投資回報角度,片商華納其實想擇日再上,不過見導演咁堅持,又見佢嘅作品一向有票房保証,最後決定跟隨Nolan意願,Keep返Tenet喺7月上映。

其實唔止啲片期因為疫情亂哂籠,連每年2月舉行嘅奧斯卡金像獎都受影響!大會今日宣布2021年嘅頒獎禮將由原定2月28日延至4月25日。搞咗93屆,頒獎禮分別於1938年、1968年及1981年延期舉行,今次係典禮舉辦93屆以嚟第4次延期舉行,頒獎禮照舊喺荷里活Dolby Theatre舉行、由ABC電視台直播,似乎無意將典禮虛擬化!

有留意開奧斯卡嘅朋友都知道,要入圍一定要喺戲院上映過。鑑於今年戲院停工至少3個月,大把戲都未上到大銀幕,因此奧斯卡有相對措施應對。首先提名電影上映期限由2020年12月31日延至2021年2月28日,俾多2個月時間各大電影公司爭期上片;而於頒獎禮前舉行嘅晚宴,今屆應該會取消。

奧斯卡頒獎禮收視每況愈下,今屆遇上新冠病毒令2020年大量電影未能如期上映,電影公司於搵錢同攞獎之間角力,似乎比較傾向前者,到時奧斯卡會有幾多耳熟能詳嘅電影可獲提名?搞得成頒獎禮但個入圍名單唔精彩,怕且改幾多次期都無咩人關心!



更多電影文章

【電影LOL】畢彼特新片 華裔女星爭演荷里活傳奇女星黃柳霜

【電影LOL.地道本周影院】20年後一樣塞 《屯門睡的文化》

【電影LOL】今個星期睇咩戲《金都》《睇你幾時死》《嚇鬼女朋友》《人工戀愛情式》

【電影LOL】事業愛情皆得意 奇洛李維斯轉性拍喜劇演騎呢中坑band友

【電影LOL】陳沖拍女排名將郎平紀錄片 國際上映前抽起 為咗賺人仔?