【雙雙vs彩瑤 Round 2】現代鬥到返唐朝 張慧儀羅霖相隔20年再度合作

無綫重頭劇《宮心計2深宮計》今晚首播,劇集搵嚟多位一綫小生花旦飾演,更邀請多位久未露面嘅藝人參演,例如康華、張慧儀,羅霖及張文慈等等。當中張慧儀同羅霖自處境劇《真情》後,相隔多年再度合作。劇中二人都係飾演尚宮局內嘅侍婢,張慧儀飾演陸司制負責掌管服裝,而羅霖飾演徐司珍負責掌管珠寶。二人雖然係表姊妹,但同時亦係世仇,喺尚宮局鬥到你死我活。

張慧儀同羅霖20年前喺《真情》中飾演雙雙同彩瑤,為咗爭阿海(黃智賢飾)而鬥生鬥死,搞到當時傳出二人私底下亦不和。而家喺《深宮計》中又要扮演世仇,佢哋由現代鬥到返唐朝,睇嚟呢段恩怨都幾難解決。