陳煒被糟質成面血嗌過癮

東方日報
陳煒戲中被辣手摧花,她毫不錫身地配合。

藝人陳煒有份演出英皇電影《墮落花》,戲中她與「金馬影帝」艾廸「角力」,當中一場重頭戲她被對方「辣手摧花」,打至遍地鮮血,慘不忍睹!

陳煒在新片中扮演警花,因「深入虎穴」查案而被艾廸毒打。拍攝當天,台前幕後雲集尖沙咀一條後巷開工,現場環境頗為髒亂,專業的陳煒卻毫不錫身,滿身「鮮血」照樣瞓地被糟質。

未試過打咁甘

艾廸「辣手摧花」十分逼真,陳煒過足戲癮之餘,更大讚對方「錫住自己」﹕「知道要拍呢場戲好緊張,因為入行咁耐未試過畀人『打』得咁厲害,驚自己唔識做反應,點知艾廸哥哥好有風度,臨場話驚整親我,根本冇真正打落嚟,只係我自己借位做反應,但睇落感覺幾真,好似好痛咁!」最終導演收貨,陳煒亦如釋重負。

爛面妝最辛苦

拍攝當日正值陳煒拍煞科戲,鏡頭外她「萬歲」請台前幕後食糖水,更不時被工作人員集郵,她搞笑說:「我埋位時,佢哋仲好似拍得好興奮咁。」據悉今次她的「爛面妝」約需一小時完成,她說:「最辛苦真係特技化裝,事關化好晒到正式埋位前,化妝師仲要不停為我加添血漿,搞到周身黐立立,一啲都唔好受。到完成晒所有拍攝工作,清洗亦好花時間,因為我成個頭都係『血』,手腳又染晒色,返到屋企搞咗好耐,不過今次係好寶貴同難忘嘅經驗。」

陳煒被影帝艾廸騎住嚟打,以致遍體鱗傷,面容扭曲,陰功豬!
陳煒、艾廸
私下陳煒與艾廸好好傾。