陳煒破紀錄 48小時冇瞓

東方日報
為了記熟少有接觸的化學名詞,令陳煒大嗌傷腦筋。

陳煒在劇集《法證先鋒IV》除了背誦化學名詞傷透腦筋外,兼且破了個人紀錄,48小時沒有瞓覺連續拍劇,她笑說:「都係靠意志撐住。」

陳煒在無綫重頭劇《法證先鋒IV》飾演化學鑑證主任,抽絲剝繭破案,不過就被劇中的化學名詞搞到一頭煙,她笑說:「每一個案件都有唔同嘅化學名詞要背,所以都好困難,自己記性又唔好,背完一場戲就會忘記佢,然後再背下一場,所以拍完依家就已經完全唔記得晒喇。」

與醫生男友未談婚

較少做警察專業角色的陳煒在劇中cool爆,最初與飾演牙醫的鄭子誠一對,後來與譚俊彥再有發展。陳煒現實中與醫生男友拍拖,問到會否令她更入戲?她笑說:「咁又冇,拍嗰陣我哋未拍拖。」

陳煒與男友感情穩定,問到可有闖過新年被親友催婚的關卡?她笑說:「冇畀人催婚,淨係得傳媒催我哋結婚,冇任何計劃,佢亦冇咁嘅提出,因為我哋相識都係好短時間,不過感情就好穩定嘅,新年佢都陪咗我去多倫多登台。 」

陳煒指今次拍《法》最難忘是連踩48小時拍攝,是一項紀錄:「因為最尾一組戲拍晒我全套劇嘅屋企戲,導演、工作人員都換咗三班我先收得工,期間48個鐘冇瞓過覺,不過就有返屋企沖咗個涼,落妝後又化番妝,再返公司拍過。當然眼瞓,捱唔到都要捱,過咗就覺得冇乜嘢,都係靠意志撐住,個人進入咗狀態就唔知邊度有啲力量令到你可以撐住。」

梅小青認真得人驚

今次是繼《宮心計2深宮計》後再與金牌監製梅小青合作,《法》更是對方退休之作,陳煒說:「小青姐真係認真到得人驚嘅監製,由籌備到拍攝、到後期,係經過好長時間,佢係全情投入,有時我哋拍到朝早八點,佢都仲喺公司,一做嘢就進入忘我境界。」

陳煒與醫生男友感情穩定,不過婚嫁就言之尚早。