陳煒吸失婚教訓拒為愛情棄麵包

東方日報
陳煒坦言失婚初期,以工作麻醉自己。

「民選視后」陳煒從不相信童話式愛情故事,年前失婚後更明白單向付出,只會令自己鑽進死胡同,刻下與醫生男友「最緊要溝通」。經過上次為感情放棄事業,讓她學懂女人擁有愛情之餘,同時必須為自己闖出一片天!

陳煒於台慶劇《多功能老婆》中,與王梓軒配成一對,新鮮感十足,她說:「佢嘅角色係『筍盤』,竟然對我一見鍾情,我理智上覺得冇乜可能,佢就用盡方法想打開我嘅心扉,整段感情我可以話『坐享其成』。」原來現實生活中,她同樣不愛做情夢,初戀發生於17、18歲:「大家係同學,好自然走埋一齊……」最終又自然地各行各路。

陳煒坦言以往有閱讀愛情小說的習慣,但從不相信公主與王子的故事會發生在自己身上。2012年與前夫顏志行結束關係後,她有一段長時間未能走出陰霾,直至被「揭發」才承認早已分開,坦言當時歸根究柢是心結問題:「對方同我傾完話要分開,我明白佢講乜但走唔到出嚟,於是用工作麻醉自己,就係因為工作太多,再冇時間畀自己去整理,呢個係惡性循環。」回想婚後移居曼谷的兩年多,她笑言由五光十色、使很多錢的日子,變成完全不用分毫:「每日就去買餸煮飯嘅生活,起初根本冇朋友!直至後來識咗個粉絲可以交流吓,唔知點解又過到。」

讚男友細心 重視溝通

離婚Dry足多年,月前與醫生男友陳國強邂逅,她談到雙方交往時說:「我本身唔鍾意八卦,即使大家一齊拍劇,我同男拍檔都唔多交流,覺得生活只係返工同放工,冇乜值得同人分享,但佢(男友)比較細心,咁有人願意關心,我咪開始願意去講囉!」對於戀情甫公開,男友即遭「起底」,但對方勇於站出來「發聲」,原來她事前不知道男友會有此「行動」﹕「佢出嚟講梗係好過我講啦!不過我都明白佢以前有家庭,有需要保護嘅人。」

吸取上一段關係的教訓,陳煒明白單向付出是錯誤的開始,相處最緊要溝通:「一切順其自然啦!咁佢每日有既定行程,我哋有穩定時間見面,我點都會繼續工作。(公布拍拖後你即刻休息,係想花多啲時間培養感情?)咁啱啫,我唔想懶落去,都想快啲開工,況且我同公司仲有好長約!」

服裝:Marella

陳煒與醫生男友着重溝通,感情穩定。