陳煒剃頭突破 山聰精壯求子

東方日報
山聰(左)、Shaun及陳煒食團年飯,大飽口福。

今日是年三十晚,陳山聰、譚俊彥及陳煒趁機抽空飯敍,兩位男士希望新一年身體健康,山聰更坦言目標是添丁,要養好身子務求「貨源」充足,陳煒則想角色有所突破,甚至不介意反串及剃頭演出!

陳山聰、譚俊彥(Shaun)及陳煒老友鬼鬼,近日相約食團年飯,食勻海鮮聚寶盤、豬手、烤鴨、黃金豆腐等意頭菜式!山聰去年大豐收,他表示:「最大收穫係娶到個好老婆,同埋劇集《金宵大廈》有好成績,真係好感恩!」他希望來年可以為觀眾帶來更多不同類型的電視劇,Shaun即提議他尋求突破,有助脫穎而出,山聰卻聞「脫」色變:「唔好脫!上一套劇《唐人街》已經脫水脫到好辛苦,希望今年畀身體休息多啲,拍啲可以肥少少嘅劇。因為2020年目標係生小朋友,唔可以搞到個身體太乾,到時冇貨出!」

結婚唔敢自己話事

陳煒亦開心表示去年有很多演出機會,更蜜運成功。問到鼠年有何展望?山聰與Shaun即時催婚,叫她請飲,陳煒卻靦覥說:「呢個唔係我自己嘅決定嚟喎!我諗我都係努力工作,今年睇咗相士,話我需要有突破性角色,例如剃頭演出。」山聰即開玩笑:「脫啦!或者反串,你之前係江湖大嫂,今年做江湖大佬啦!」陳煒笑言相信其男裝扮相不俗,大讚山聰好提議。Shaun則表示去年最開心是拍完及播完《包青天再起風雲》,之後可以做回自己,希望新一年身體健康:「之前拍嗰套劇要碌山,發覺自己唔再係廿幾歲喇!」

Shaun難得休息天倫樂

山聰與陳煒新年會去加拿大登台,首次派利是的山聰笑說:「我要去嗰度𢭃啲利是先再派!(今年派雙封?)呢個『雙封』唔使睇醫生,係派完傷啲,哈哈!」問到陳煒會否到男友家中拜年兼見家長?她說:「冇安排,唔知呀!」而Shaun新年難得不用開工,可以陪家人:「返咗無綫咁多年,個個節日都要開工,今年可以畀啲時間屋企。」

場地:羲和雅苑

陳山聰新一年最大目標係生個鼠B!
陳煒希望角色有突破,剃頭演出都制!
鼠年新開始,3位都想事業更上一層樓。