陳法拉爆老公恨來港二人世界

東方日報
新婚的陳法拉,為工作要香港、紐約兩邊走。

陳法拉婚後首次公開露面,坦言新婚生活很開心,但暫時想過二人世界,未諗生B,並計劃12月度蜜月。她指老公現於紐約,但很喜歡亞洲,希望移居亞洲生活。

藝人陳法拉今年5月於巴黎與男友Emmanuel Straschnov結婚,昨日是她婚後首次在港出席公開活動,期間多次表示新婚生活很開心,於法國結婚就如旅行般,現時丈夫已返回紐約工作,而她則香港、紐約兩邊飛及忙拍戲。問到婚禮上老公有否講愛的宣言,她說:「食飯時佢話要講段說話,佢用普通話同我父母講,意思大約係會照顧我、對我好,我冇諗過佢會當眾咁講,所以好感動。」又指婚宴上父母好開心,更有跳舞:「第一次見爸爸跳舞,我媽咪係跳舞老師,當時佢跳到拱晒橋、扭腰,仲瞓晒地。」

計劃南極度蜜月

法拉透露不會在港補擺酒,問到父母有否催生B,她說:「過吓二人世界先,依家計劃緊度蜜月,大概12月啦!想去南極、南美洲咁!呢啲第日帶唔到小朋友去。」昨日未見戴婚戒,她即笑言自己專業,怕搶活動風頭。問是否習慣婚姻生活,她說:「都習慣,因為拍咗拖三、四年先結婚,習慣咗一齊生活,只係有時改唔到口叫老公,仲係叫男朋友。」並透露下月在港客串一部電影,問到若長時間留港會否叫老公一起回來時,她說:「佢話好鍾意亞洲,而且識講普通話,有時都問我有冇機會喺亞洲工作,想跟埋我返嚟生活吓。」

同場的袁澧林透露之前拍攝一部有關導盲犬的電影將上映,稍後要中港兩地宣傳:「戲中有八成嘅對手戲都係同狗狗,雖然戲中係一隻,但其實有八隻輪流演出。」