陳柏宇御妻術:當佢狗咁!

東方日報
冇錯,要當老婆係狗咁湊!

「隱世歌王」陳柏宇跟「傳奇歌手」方皓玟12年來難得一遇齊開騷,同是唱得之人加上已婚身份自然話題多,緋聞、生B,甚至閨房樂統統講一餐,方皓玟自爆和老公會嗌到攰,而Jason則有套御妻法:「當佢狗咁看待」,人夫好大膽。

陳柏宇(Jason)與方皓玟將於11月首度同台舉行「拉闊音樂會」,重提12年前,兩人與王浩信等一班人去唱K而認識,雖少私交,不過相當有緣,同於兩年前結婚。談及夫妻間相處之道,Jason讚太太符曉薇好好,說話好直好「憎」:「不過係乞人憎個憎,佢一發脾氣就講啲好mean嘅說話。(講分手?)梗係有啦,鬧交時我一定讓步,因為知佢唔讓步。喺呢段關係中,呢件係我願意為佢做嘅事,希望佢同朋友鬧交時,學識同我一樣做讓步嗰個。」

文化差異嗌大交

至於表面「食住」日籍老公的方皓玟,也會和老公嗌霎:「冇話我強,佢都硬頸o架,有時會為啲文化差別鬧交,嗌到大家都攰,知拗嚟冇乜用就停,但唔會有隔夜仇。」Jason聞言大表羨慕:「你就好啦!」再自爆太太「翻嬲」的悲慘經歷,指有次和太太日頭鬧交再氹番,豈料她夜晚睡不着,胡思亂想下再「翻嬲」:「我睇佢眉頭眼額超叻,第二朝同佢講『我BB又嬲喇』氹番佢。(送禮物至work喎!)如果次次送禮物會破產,應該好似養狗咁,用零食氹佢係唔健康嘅。」

兩人又說開騷時會各自帶子女到場,育有一女的Jason打算三個月後全力造人,因為太太催再生:「仔女冇所謂,但我同女仔感覺易親近啲,生兩個就夠數,否則荷包會頂唔順o架!」方皓玟就話現時囝囝學粵語、日文及英文三種語言,但對日文特別有反應,當聽到意思是「好食」的日文時,就會擺出好萌的甫士。

陳柏宇大爆「家醜」,唔怕老婆又嚟料?
陳柏宇與方皓玟結緣於12年前,難得可以一齊開騷。
方皓玟承認與日籍丈夫難免有文化差異。