陳曉華教路真面目咪P圖

東方日報
應屆冠軍黃嘉雯(左)和陳曉華提供網戰貼士,靚女們要聽清楚喇!

新一屆港姐昨日舉行招募活動,三位冠軍級師姐馮盈盈、陳曉華、黃嘉雯分享「網戰」影靚相貼士。據悉,以網上形式舉行的港姐連面試泳衣環節也構思直播,又以薪高糧準吸引空姐參加。

馮盈盈、劉佩玥、陳曉華、黃嘉雯等歷屆香港小姐昨日出席《2020香港小姐競選》招募記者會,因疫症肆虐曾一度宣布停辦的港姐,「復活」以網上平台進行,決賽則回復實體形式。據悉,大會以「逆市筍工」來吸引受疫情影響的美女參賽,當選後薪高糧準,並特別以吸納空中小姐為目標。今屆賽事由面試到受訓環節皆會在網上直播,連過往只於內部進行的面試泳衣環節亦構思為直播。

增個人化環節

港姐統籌經理余詠珊指今年港姐改到網上進行,會加入不少新環節:「有好多個人化嘅環節,可以睇到佳麗嘅生活狀況、着衫品味、性格,仲可以互動問問題,希望做到網上、網下同樣精彩。」

要爭取入圍,影靚相參選不可或缺,陳曉華便分享貼士,認為打燈好重要,可令輪廓更突出,但不要P圖。黃嘉雯則着重創意,她舉例:「例如潛水教練可以着潛水衣,健身教練就以運動造型示人。」而馮盈盈同樣認為光線很重要,採用自然光最好,認為上鏡和真人不應相差太遠,她自爆:「我參選時特登搵咗專業影樓去影報名相,後來去到面試工作人員話搵我唔到,以為我冇嚟。」

將江嘉敏降呢

前日盈盈26歲生日,與家人食飯慶祝,緋聞男友鄭衍峰冇份,又稱何家公子猷亨也沒有相約慶祝。談到跟江嘉敏鬧翻的傳聞,她說:「冇咁嘅事,其實係一件好小嘅事,大家喺網上抒發吓唔使猜測。(江嘉敏話『知人口面不知心』係咪指你?)我真係唔係好清楚,亦唔會問,朋友都要畀啲私人空間。」盈盈又否認二人面和心不和,不過,似乎已將對方由好姊妹「降呢」為朋友 。

馮盈盈向準師妹傳授秘訣,講到相當肉緊。
何依婷粉墨登場變身空姐,鼓勵靚女踴躍參選。