陳振華妻千字文力數賤男惡行 出軌家暴借錢走數:你有冇人性㗎!

《金宵大廈》截圖

香港土生土長印度人陳振華(Ricky),淨係睇個名大家可能對佢感到陌生,其實佢就係《金宵大廈》中少數族裔警察Raj,同鄧佩儀飾演嘅晴晴係一對。自從劇集出街後,陳振華多咗演出機會,有唔少傳媒仲紛紛訪問佢。陳振華當時就坦言做綠葉演員嘅收入有限,所以佢都要靠其他職業去養活老婆同個女,好似搬運工人及髮型師都做過,陳振華會不時到天水圍為癌症病人免費剪髮做義工,好爸爸同好男人形象深入民心。

點知今日陳振華老婆Alison就喺網上撰寫千字聲明數臭陳振華,話佢相當有問題,無論對事業定家庭都完全不負責任!首先,Alison就寫到原來陳振華喺外面周圍借錢,仲要歸究係老婆成日攞佢啲錢。之後,仲話佢更加在外偷食「北姑」,銀包得返10蚊都俾陳振華拎埋返大陸,而政府資助、個女嘅利是錢同埋朋友接濟嘅錢,通通俾佢袋晒落袋,搞到Alison同個女食都冇得食,連學費都交唔到。Alison更表示:「同你捱咗咁耐換返嚟就係呢啲?為咗隻廣州雞棄埋個女都算,仲要同人哋唱完我再唱衰個女,你有冇人性㗎!」

另外,Alison仲話陳振華咁多年嚟,只係兩人分開前幾個月俾過約2萬元生活費,然後就唔知去咗邊。佢話陳振華對囡囡係冇負過責任,甚至仲虐待佢:「出世咁耐你一件玩具都冇買過畀個女啦!淨係送過一包糖咋!個女記到而家呀!嗰隻糖你個女以前唔食㗎!因為你佢鍾意咗呢隻糖,話你買過畀佢!成日都叫我買!因為佢好開心係你送畀佢!」又表示:「唔好再講到自己咁委屈話我教個女趕你走!首先個女冇趕你走,你要仆倒去搵隻北姑唔返屋企係你嘅事!唔該唔好再同人老作!第二係你自己對個女衰令個女討厭你!係邊個掉低個女一個人喺餐廳走咗去,最後要餐廳嘅人打嚟搵我我先知道?!係邊個打到個女流血?!係邊個成日打個女個頭話個女賤?!係邊個一巴巴打落個女度!係邊個成日講粗口鬧個女嚟威脅我?!」

除咗以上指控之外,Alison仲指陳振華嘅工作態度亦有問題,一方面講到自己好勤力、又話有個演藝夢、仲同網民承諾會加把勁做好戲等等。不過事實上陳振華有工開亦會懶得去,Alison大爆陳振華早前同容祖兒拍攝廣告時耍大牌「同Joey拍廣告,人哋Joey拍咁長時間都未發脾氣,你喺片場發晒爛渣同我講話要X人,又叫人拍你先!話人阻住你返大陸拍嘢!態度又差!唔知真係以為你係國際巨星連Joey都差啲要行埋一邊讓你拍先!」認真未紅先驕!

Alison好嬲決定隔空叫陳振華回港離婚:「本來冇得罪你,只係因為你自己有北姑而分開,你都可以癲到連公屋都特登取消埋唔畀我同個女!係你當咗自己大明星之後就去叫雞呀!收嘴唔好再抹黑我同個女!同埋麻煩盡快回港辦理離婚手續!」更澄清:「本人跟件垃圾香港印度裔演員陳振華先生早已分開,並沒有見面及聯絡,佢最近喺出面周圍問人借錢走晒嗰啲數與我無關,我建議咁多位最近不約而同地曾經搵過我嘅受害人報警。」

陳振華
陳振華
陳振華