陳慧琳指做到歌手全靠鄧建明 JoeyTang開騷李克勤、鄭中基爆《紅日》秘密

娛樂

浸淫圈中多年嘅音樂人鄧建明(JoeyTang)相識滿天下,早前喺九展舉行演唱會,Joey就碌爆人情卡邀得唔少圈中好友擔任嘉賓,當中包括陳慧琳、李克勤、鄭中基、側田、蘇永康、林德信等等,星光熠熠。

撰文、圖片:東方新地

鄧建明面變尖身型fit爆邊彈邊唱冇索氣

當晚Joey以一身黑皮褸造型登場,邊彈結他邊唱〈拼命三郎〉、〈頂天立地〉等經典歌為演唱會揭開序幕。早前因為牙痛而接受口腔手術,Joey自誇手術後面形變尖,靚仔咗再加上做運動健身,成個人fit晒,所以全晚換足十支結他邊彈邊唱都冇索氣!

Joey同Kelly合唱經典歌〈風花雪〉 及〈嚴重〉。

陳慧琳試音驚到震 得Joey肯定成天后

著黑色透視長裙嘅陳慧琳提到Joey係佢入行第一位接觸嘅音樂人,全靠對方佢先可以通過試音成為歌手,Kelly表示:「如果當日唔係Joey哥喺我試音時話OK,我今日都唔會企喺度。」Joey笑言當年早知Kelly係可造之才,Kelly搞笑話:「早講吖嘛,我當時好驚,見佢外形好cool,以為佢好惡㖭!」

陳慧琳自言多得Joey為佢試音先有今日嘅Kelly ,點知Joey話:「當日試完音見到Paco ,我話唔係唔簽嘛?佢笑笑口話『簽咗啦!傻仔』。」

孖李克勤唱〈紅日〉對此歌有情意結

其後到李克勤登場,克勤孖Joey唱出〈紅日〉,Joey話對呢首歌有情意結:「為咗呢首歌,我第一次好認真咁入錄音室錄歌,負責彈同埋做和音㗎!」另蘇永康又大讚Joey係一個 EQ好高嘅監製,無論自己或者Big4開演唱會都會搵對方做音樂總監:「Joey脾氣好,係真心為歌手好,樂壇有佢係福氣。」成晚嘉賓輪住上台,足見JoeyTang嘅人緣極佳。

同Joey老友鬼鬼嘅克勤出場時笑言:「我同Joey識咗幾十年,無諗過佢表演時原來咁多表情。」
鄭中基話Joey偏心,克勤出嚟有音樂伴奏而佢冇!鄭中基又爆自己先係唱〈紅日〉嘅真正和音:「Joey唱嘅和音,唔收貨,於是叫我去補和音。」
蘇永康自爆同Joey相識30年,由佢主唱嘅《壹號皇庭》系列劇集歌,都係由Joey幫手編曲。
側田以及久未露面嘅何婉盈亦有撐場。

延伸閱讀:

性感女神溫碧霞帶病開工有回報 新片《嫌疑者說》奪《金雞》十大

36歲梁靖琪下嫁細8年男友 極速陀B幸福滿瀉