陳意嵐陳康琪「禁地」揀性玩具

東方日報
陳意嵐(左)與Odilia打扮性感,又揸住Nude Bra高談闊論,非常搶眼!

藝人陳意嵐與組合Bingo成員Odilia約埋去街,竟然殺入「禁區」睇性玩具!二人不但攞上手研究,更睇到細聲講大聲笑,然後轉場睇性感內衣,莫非兩女轉「性」,連內裏都要Open過人?

行性感的陳意嵐(Tarah)與曾扮「Double May」的陳康琪(Odilia)看似大纜扯唔埋,原來私下勁Friend,日前更結伴到尖沙咀行街。以貼身低胸裙配皮褸的Tarah,與身穿短裙仔晒腿的Odilia在人群中非常搶眼,沿路吸引不少途人眼望望,見她們進入一間大型雜貨店,逛了一會後便直入「禁區」,原來那裏賣的是性玩具!

鍾情通窿Bra

兩女無懼店內人來人往,大膽攞起各式各樣的性玩具研究,期間傾到嘻哈大笑,非常興奮!二人又懶理着短裙,踎低投入「尋寶」,但最終冇幫襯。其後她們睇Nude Bra,見到Cosplay服裝即貪玩拼上身,又攞起玩具錘仔及長劍互片!玩完一輪後,她們再轉場睇內衣,Tarah為Odilia揀火辣紅Bra,自己則睇中一個黑色喱士通花Bra,更放在眼前測試通窿效果,連看了數款性感內衣後,二人最終都忍手冇買,未有斬獲。

讚大開眼界

對於在公眾地方「大解放」,她們受訪時透露正拍攝ViuTV與性有關的節目《啪啪Partner》,為惡補知識而親身研究性玩具及性感內衣,Tarah笑說:「本身完全唔識呢啲,佢哋講到好多花款,所以要進修吓,有啲睇完都唔知點玩,要上網再學習吓。」

Odilia則笑說:「因為節目而接觸到更多性知識,真係眼界大開,亦聽咗好多朋友嘅親身經歷。(擔心外界覺得你哋性開放?)唔關事,只係少人拎出嚟講啫,其實呢啲係好家常便飯嘅傾偈。」

着短裙仔又點?性玩具咁吸引,照樣踎低慢慢揀!
用對眼試Bra?陳意嵐(右)真係大整蠱!
陳意嵐拍攝與性有關的節目,不怕被指「性開放」。