陳山聰簡單婚禮搞掂晒!

東方日報
陳山聰的新劇獲好評,令他非常開心。

藝人陳山聰昨日到電台宣傳新劇《金宵大廈》,開心外界反應正評:「好似打咗支強心針,多謝監製大膽用我做男主角,套劇未出街前有少少擔心,但可能因為之前《十二傳說》好成績,所以公司肯試吓,反正陳山聰唔得嘅咪跌番落去,我又唔係收視保證,所以唔得係應該,唔得就做番其他角色,所以抱住勇字行頭嘅心態。」

講到又要宣傳新劇,又要拍攝新劇《大步走》,豈不是沒有時間籌備婚禮?他說:「其實好簡單,冇儀式、冇出門,淨係喺酒店簽字同食飯,要準備嘅嘢都安排好晒,其他嘢就交畀太太安排。」他又透露下月中會到雲頂舉行首個個人演唱會,一小時唱十幾首歌,又笑言會唱當年自己的歌《ABCD》:「以前我好抗拒唱呢首歌,不過呢兩年開竅諗通咗想唱。」