陳山聰情傷覺醒護妻趕生B

東方日報
幾經波折,事業與感情均有所收成。

剛踏入43歲的陳山聰主演的劇集近日好評如潮,他正享受事業高峰期,下月又會跟女友Apple結婚,但曾幾何時,他亦處於人生低谷,坦言離婚經歷促使其成長,深明絕不能再犯錯。日前他分別獲兄嫂、女友及圈中好友為他慶生,明言今後會好好珍惜他們的愛,又想「留一樣嘢喺世上」。

陳山聰首次擔正男一的無綫熱播劇《金宵大廈》被譽為神劇,感情方面,他下月初將與拍拖5年的女友拉埋天窗,看似事事順利,其實他數年前都經歷過高山低谷。2011年與前妻Ponny離婚後,他與賭王千金何超雲拍拖,情場攀上頂峰,同時事業跌入谷底,兩人分手後,一切推倒重來,他重返無綫從零開始,加上結識了Apple,生活才重回正軌:「人生每個經歷都值得細味、值得成長,感恩經歷過嘅一切,一步一步咁走,直到近年大家都覺得『陳山聰有改變』,我會好好珍惜。」

老婆生日焗「讓路」

山聰坦言離婚經歷令他成長,確信將來會更好,因為明白到不能再犯錯,也懂得好好保護得來不易的感情:「希望將來每日同太太過得開心,咁已經足夠。」並感激女友5年來在精神以至生活上的支持:「無論我收工幾夜返去,佢都冇怨我冇時間陪佢,同埋每年佢生日我都唔可以同佢慶祝,因為佢同TVB同一日生日,我要完騷後先可以返去同佢切蛋糕。」

朋友都知道山聰向來喜歡「搞花臣」,人生大事卻一切從簡,他說:「尊重太太意願,大家都想簡化啲,香港一次過搞掂。因為仲拍緊《大步走》,只係中間放兩日假去結婚,有個儀式、簽張紙、夜晚食餐飯,好簡單。其實開頭大家唔想搞,連餐飯都唔諗住搞,想屋企人食飯就算,我話唔好啦,成班兄弟姊妹可以玩吓、影吓相,來賓都係我哋最好朋友,係一個好簡單嘅Party。」正如他所言,身邊有愛自己的人已足夠,所以他數日前生日未有大事慶祝,只與女友及哥嫂吃了一頓飯,手捧一個小蛋糕許願,溫馨又簡單。

恨生女嗲爹哋

講到求婚過程,山聰自爆絕非大家期待的跪地、放煙花,而是比普通更普通:「喺佢舊年生日求婚嘅,當晚食完晚飯返屋企,佢都好奇怪點解我冇禮物,跟住我就攞隻戒指出嚟。其實一直都有結婚計劃,我話差唔多時間,去簽字結婚啦,佢話OK,就係咁簡單。我一直覺得需要畀個名分佢,我又想生小朋友呢,拍完《大》劇就『開工』喇!」以往從沒計劃生BB,他承認全因兄弟們令其心態有大轉變:「年幾前開始有呢個念頭,以前唔覺得會湊到,我哋兩個又嚮往自由,但係身邊朋友郭政鴻、黎諾懿、張達倫都做咗老竇,見佢哋好開心,而太太細妹個囡囡出世,我又成日湊住佢玩,自己感覺好Ready做爸爸,會諗人生係咪要留一樣嘢喺世上,或者為咗我哋陳家又好,哈哈!不過都係等上天安排,冇諗生幾多個,有得揀我就鍾意女,女會嗲住爹哋嘛!」

化妝:Chloe Yu

髮型:Seiko Sin@Hair Culture

服裝:Commedesgarcons@ITHK

<!--AD--><div class="footerAds clear">第一手消息請下載on.cc東網<a href="http://itunes.apple.com/hk/app/id349812998?mt=8" target="_top">iPhone/</a><a href="http://itunes.apple.com/hk/app/id387862928?mt=8" target="_top">iPad/</a><a href="http://market.android.com/details?id=com.news.on" target="_top">Android/</a></div><!--/AD-->

陳山聰
山聰感激女友的忍耐,承諾照顧她一生。
生日有兄嫂及女友陪伴,山聰倍感窩心。
陳山聰於《金宵大廈》擔正男一,飾演「保安阿蕭」。