陳展鵬為妻女 搬風水屋轉運

東方日報
陳展鵬搵啱「風水屋」,開心到舉V!

陳展鵬兩年前與港姐單文柔結婚,現時他出外拚搏,老婆則專心湊女,一家幸福快樂。展鵬能如此安心搏殺搵錢,最主要是他已覓得「風水屋」,為妻女添置安樂窩。不久前與無綫以相當好價錢續約的他,之後還會回歸樂壇,似乎一切比之前順利!

視帝陳展鵬入行廿多年,初期曾於無綫及亞視拍電視劇,亦拍過電影,之後做埋歌手,輾轉重返無綫後,2016年憑《城寨英雄》奪得「視帝」,兩年後與單文柔(Phoebe)結婚,翌年喜獲女兒「小豬比」Quinta,一家三口幸福快樂。

雖然一切看似順利,但其實展鵬身為家中獨子,甚有壓力。兩年前,向來孝順的他在將軍澳租了一個800呎單位與家人同住,不過當時與業主發生糾紛,期間母親亦於家中跌倒,撞到腦震盪入院,陳母至今身體仍然未好番,幸而展鵬一直得老婆Phoebe支持,而她亦絕對旺夫,打理屋企頭頭是道,展鵬亦非常愛錫妻女,剛剛另覓「風水屋」,家人終有個安樂窩,自己出外搵銀都更放心。

親自打造安樂窩

這間「風水屋」由展鵬親自「主理」,一切都以太太及女兒為主,而Phoebe的親戚亦住在附近,大家有所照應。據知,屋苑附近有一個很大的遊樂場,適合一歲多的小豬比遊玩。雖然展鵬忙於拍攝劇集《超能使者》,但仍為新居親力親為,不時與設計師、裝修師傅用電話溝通傾談裝修事宜,不用Phoebe操心,專心湊女。展鵬新居裝修風格和諧,他更親自為愛女設計「專屬小天地」,小豬比的房門更有她的英文名「QUINTA」,十分窩心。

升呢老竇搞突破

展鵬年初拍完《逆天奇案》後,現正趕拍《超》劇,他受訪時坦言:「呢個時勢,最緊要大家有嘢做,咁啱我又有番好多劇拍。近呢兩、三年媽咪病咗,都要照顧佢,之前太太有小朋友,自己都接少咗工作,依家多咗機會拍番係開心嘅!」之前爆出他會重返樂壇,簽唱片公司出歌,他坦言正與兩間唱片公司洽談中。據知,他年前才跟無綫續經理人合約,雙方關係良好,無綫亦給他一個相當好的價錢,故下定決心繼續留在無綫,他現時一心希望做個好爸爸、好老公。他說:「唱片公司其實兩年前我已經開始接洽,今次可能係經理人知我做咗爸爸,要突破吓,同我傾吓不如再唱歌啦!其實至今都傾得好開心,唱片公司老闆都好難得,肯投放好多資源,做啲好嘅音樂,依家仲傾緊啲細節,好快同大家公布。」

他表示以前一直租屋住,搬屋除了想家人住得舒服些,亦都因為之前遇到不好的業主,令媽咪身體差,又住得不開心:「依家呢度係親人嘅,交租畀自己人點都好啲,唔使出面有啲乜嘢問題又要搞一輪,呢兩、三年自己經歷咗好多嘢,媽咪病咗,依家仲病緊,自己又多咗兩個角色,老公同爸爸,兼顧嘅嘢係多咗,所以要考慮、費心嘅事又多咗。」

單文柔抱住囡囡喺露台睇風景!
陳展鵬為囡囡打造溫暖安樂窩。
為囡囡設計「專屬小天地」。