陳展鵬劈竹傷指大肚妻訓話

東方日報
陳展鵬

陳展鵬在新劇以真功夫示人,日前拍攝劈竹棚場口時差點被扑中頭,雖然最終只傷及手指,但下個月生得的太太單文柔已很心痛,公開留言問他可否小心一點。

藝人陳展鵬與敖嘉年正忙於拍攝無綫劇集《唐人街》,主角除了有展鵬外,還有陳山聰、姚子羚及唐詩詠等,個個都要打到飛起,眾人更親身上陣,故拍攝前要特別上堂集訓,各人還有不同秘技及招數,絕對令觀眾期待。展鵬剛剛拍攝一場劈竹棚的場口,看似好簡單但實情絕不容易。

當導演嗌Roll機,展鵬一手劈落竹棚,但竹枝又大又硬,掃落時更有一支差點扑中他的頭,難怪展鵬笑說:「好彩擋得住!擋唔到又要縫幾針。」最搞笑是他要以型仔甫士結尾,但一停機即狂揈手,痛到飛起,Fans讚他的表情很cute!由於親身上陣,展鵬不慎整瘀手指,幸而只是輕傷,但下月分娩的太太單文柔就相當心痛,在社交網留言:「你小心啲可以嗎?」女兒「小豬比」就快出世,做爸爸的展鵬真的要小心!

敖嘉年被車拖行 整親膊頭

至於嘉年亦拍攝多場打戲,先後傷及手指與膊頭,同樣十指痛歸心!飾演子羚哥哥的他,雖然有武功底子,但受訪時不禁說:「拍劇始終唔同,又要就角度同鏡頭,呢套劇係歷年打得最甘嘅一套!」日前,嘉年拍攝一場被車拖行的戲份,傷及膊頭也不知情,他說:「傷咗我都唔知!嗰日拍完返屋企沖涼,先至覺得好痛,都唔知幾時整親!之前同山聰拍一場打戲,一出鷹爪又拗咗一下,手指即時腫晒,武指即刻幫我攞冰敷。依家拍親打都好驚,真係周身傷晒。」

陳展鵬一劈,竹棚即四散,差啲被扑中!
猛咁揈手,梗係好痛喇!
敖嘉年