陳家樂孭飛壓力大 喪咳惹病李靖筠

東方日報
陳家樂同李靖筠拍住上,大呻緊張。

最近武漢肺炎肆虐,人人聞「咳」色變,無時無刻口罩隨身。藝人陳家樂前晚抱恙現身首映,期間忍不住咳嗽,尷尬得面都紅晒,拍檔李靖筠大爆近日開工雙方頻頻近距離談話,搞到自己都有幾聲咳!家樂即澄清並非染上肺炎,而是壓力大導致身體不適!

陳家樂、李靖筠、林盛斌、郭奕芯、孫慧雪、張建聲及吳家麗等,前晚出席英皇電影《我的筍盤男友》首映,電影公司老闆楊受成率領旗下藝人吳浩康、鍾舒漫、周家怡、泳兒、湯怡及曾樂彤等撐場,相當熱鬧。期間,一眾主演與現場觀眾玩遊戲,又齊齊進行撈起儀式,預祝票房大收!

病足3星期出紅疹

抱恙上陣的家樂透露病了近3星期,起初只是感冒,雖然很快就退燒及收鼻水,但仍有咳嗽,他未有到醫務所求診,聖誕節當日自行買咳藥水,不過後來咳得更厲害,身體更出紅疹,他說:「要去醫院睇急症,不過搵唔到原因,驗完血又冇食物敏感,唯一可能係壓力大同緊張。依家仲有咳同敏感,食緊西藥,想轉中醫睇吓。」問到是否因孭飛新片所以壓力大?他說:「有少少,第一次喺咁重要檔期上愛情片,不過都平常心。(包場睇?)包咗一場親友同粉絲睇,睇反應啦!」說罷又忍不住咳嗽,尷尬得面紅紅。李靖筠笑指近日與家樂宣傳頻頻吹水,結果亦有少許咳,家樂即澄清並非染上武漢肺炎!

𢭃利是行善

新片上映,李靖筠坦言心情緊張:「有少少心虛,作為新演員就孭飛咁重要嘅檔期。我好畀心機拍,又做咗好多宣傳,我哋都約埋導演初一到初四去戲院謝票,到時收到嘅利是會捐去做慈善。」

另外,家樂日前現身另一部參演電影《緊急救援》北京首映,談到繼電影《破風》後再與彭于晏合作,他透露上次拍攝嚴重受傷,彭于晏一直很關心他,今次再合作亦同樣體貼,令他非常感動。

撈起玩到忘形,搞到成身都係!
楊受成率領旗下藝人撐場,夠晒熱鬧!
郭奕芯化身Pink Lady放「峰」。