陳家樂嗒糖約林愷鈴露營培情

東方日報
家樂同Ashley郎才女貌,不妨發展吓!

型男陳家樂見到「最索星二代」林愷鈴(Ashley)不禁表達傾慕之情,一句說話用足8個「好」字,將Ashley捧上天!記者欲拉紅線撮合,家樂卻突然縮沙自嘲是叔叔!

家樂及Ashley昨日出席服裝品牌活動,家樂出場前把握時間與外圍Fans互動!其後兩人一同受訪,家樂不時望住Ashley冧笑,講到興起時更用手掩面,非常怕醜!他笑言久仰Ashley大名,終於可碰上一面:「有聽到啲人話佢係最強星二代,覺得佢好好,好叻、好聰明、記性好好、笑容又好甜美!(好多個『好』字喎!)係呀!佢係幾好!」一句說話就有8個「好」字,看來家樂對她大有好感,嗒晒糖!

查家宅問歲數

記者笑指Ashley符合其「條件」,並幫忙撮合,家樂卻怕醜嗌唔好,自稱叔叔的他急不及待護花:「你哋唔好嚇親人,遲啲我會同佢媽咪(龔慈恩)一齊拍戲。」Ashley「回禮」笑說:「媽咪都話佢戲好,又靚仔!」二人互笠高帽,令家樂不禁大呼緊張,又自言出晒汗,場面爆笑!問到Ashley之後會否探媽咪班?家樂抵死搶答「都好呀」,而她表示可以探班,但要遷就上學時間,家樂聞言即關心她讀幾年級,得悉是大學一年級後笑說:「仲以為只係中三、四!(知道幾大啱唔啱?)唔會諗呢啲嘢啦!」轉頭又繼續「查家宅」追問她的歲數:「佢得18歲,我30幾啦!最近忙拍戲已經忘記呢啲事,同佢媽咪拍多幾年戲先。(行外母政策?)拍吓戲先啦!」

恨做老竇玩BB

Ashley最近頻頻露面出席活動,問到是否賺了不少零用錢?她指最重要是攞經驗,家樂聽完又忍唔住繼續讚:「識講嘢!(有冇加分?)佢不嬲都好高分,但唔好太高分,太高分就有距離感。」又坦言想合作拍戲,問到是否想演情侶?他抵死笑稱可以做兄妹,甚至父女:「一路拍戲都想試吓做爸爸,真係抱住一個BB。(咁快想生?)想呀!想玩BB。」記者催促他搵女友時,他即含羞邀請Ashley得閒去露營,二人互望冧笑,氣氛曖昧!

Ashley受訪時,家樂全程「心心眼」望實甜笑!