陳家樂叫女友買飛捧新片

東方日報
周家怡(左起)、陳家樂與湯怡現身造勢。

藝人陳家樂與連詩雅低調處理感情事,但前晚家樂出席首映時,多次被問到「另一半」,搞到他面紅耳赤,最終更以林文龍作擋箭牌「脫險」,場面爆笑。

陳家樂、湯怡、英皇老闆楊受成、林嘉欣、周家怡等前晚現身尖沙咀,出席電影《死因無可疑》首映,場面墟冚。家樂與湯怡受訪,談到疫情放緩後再次出席首映,感觸良多,家樂坦言疫情令過去半年減少工作,他說:「都係好事嚟,因為之前真係好多嘢做。(呢半年最大得着係乜?追到連詩雅?)係搵番工作嘅熱情。(今晚有請女友嚟?)我請咗好多朋友,即使今晚唔嚟得,都會叫佢哋入場,不過自己買飛!」記者再追問他有否追看連詩雅演出的劇集《那些我愛過的人》,他說:「呢兩日有睇,畀林文龍先生同個女拉扯嗰場戲感動,喊咗出嚟。(黃翠如捐肝畀連詩雅嗰場好睇?)咁啱冇睇,總之套劇好睇啦!」

周家怡返娘家「升職」

另外,周家怡將回歸「娘家」無綫,夥拍羅仲謙及鄭嘉穎等演出重頭劇《兒童醫院》,她說:「今次返去係因為同導演及編劇嘅關係,當年佢哋開劇,我先有人識。(衣錦還鄉?)咩呀?不過今次返去真係有好大感覺。」記者打趣指她以前拍醫生題材的劇是扮護士,今次「升職」做醫生,她說:「都咁嘅年紀啦,我以前拍醫護劇從未入過手術室,今次終於一嘗夙願。(酬金好吸引?)唔係酬勞問題,最重要導演同監製好好,同埋遇到好劇本、好對手。」有指今次以「女一」身份登場,她謙稱:「唔好咁講,主角之一囉。(有冇提出特別要求,例如休息時間長啲?)劇組會採用拍攝電影嘅手法,預計會比較舒服。(角色有咩要準備?)染黑番啲頭髮囉!」

林嘉欣的導演老公袁劍偉被問到對票房可有壓力,他說﹕「盡力做。」談到兩名囡囡未有到場,嘉欣說:「佢哋聽朝要返學,有同佢哋講我哋出席首映,佢哋以為好似外國咁要行紅地氈,我就話我哋好低調。」

楊受成伉儷(右三、四)出席首映,為眾演員及幕後打氣。