陳家樂初試啼Sing錄音NG百次

東方日報
陳家樂(左)與李靖筠

升呢賀歲片主角的陳家樂與李靖筠,新一年希望繼續進步,家樂還有機會入錄音室一展歌喉,但笑言被作曲的李靖筠整蠱,歌曲超難唱!其中一句要錄足100次,令他信心受挫。

陳家樂與李靖筠(Gladys)過去一年事業大躍進,齊齊升呢擔正英皇賀歲片《我的筍盤男友》,家樂去年更有三戲一劇面世,Gladys則踩入樂壇擸新人獎,但兩人未有自滿,寄望鼠年繼續進步!

家樂前年憑劇集《逆緣》中「爺爺」一角成功入屋,他希望今年再演令人印象深刻的角色:「出街畀人叫我角色名,比起叫我真名仲開心!」問會否開拓版圖挑戰唱歌?他笑言為《我》片已初試啼聲,卻發現原來不易:「我以為我唱歌OK,點知錄音要逐句唱,有一句仲錄咗100次,幾打擊吓!(有冇嚇親唔敢再唱歌?)唔會呀!會上癮,做到後覺得自己捉到竅門。(做歌手?)又未必,可以唱吓主題曲。」

享受單身:冇刻意搵

感情方面,家樂已單身年多,問會否心急再拍拖?他說:「隨緣啦!冇刻意搵。(唔Dry咩?)咁又唔需要長時間濕潤嘅,我都幾享受一個人整嘢食、煲劇,屋企人都冇催我。」

首次合作演情侶的家樂及Gladys一拍即合,但笑言只限在戲內撻着愛火花,家樂說:「繼衛詩雅之後,佢成為我另一個幾信任嘅朋友!我覺得佢好爽直又唔扭擰,反而我會收收埋埋多啲。」Gladys笑指家樂跟角色一樣外冷內熱:「佢平時鍾意蝦蝦霸霸好似『胖虎』咁,其實內心係有脆弱一面!」

場地:英皇鐘錶珠寶中環旗艦店

鼠年願望係乜?一個字話你知!
陳家樂讚李靖筠夠爽朗,一拍即合成好友。