陳家樂初會女神陳瀅猛講是非

東方日報
陳家樂與陳瀅已被視為一對,但他表示雙方只是好朋友。

藝人陳家樂入行約13年,星途絕對不算暢順,以往總與幸運之神擦肩而過。去年他因劇集彈出,時刻提醒自己要踏實應對,更感激導演林超賢的知遇之恩。談到緋聞女友陳瀅,家樂言談間流露欣賞,可惜彼此關係只是「戀人未滿」。

家樂的娛樂事業經歷過高山低谷,去年終憑電視劇《逆緣》闖出自己事業的一片天。名氣得來突然,他提醒自己時刻保持平常心,直言工作量比較實際:「依家會覺得冇工作安排嘅話,個心即刻唔舒服,總之要認真對待每個機會!」30歲出頭的他猶記得當年參加新秀未能成功晉級,後獲得經理人公司英皇娛樂的賞識,發覺星途一點也不易走,更一度打算放棄:「坦白講,我屋企唔係有錢,唔想爸爸太辛苦,捱咗一段時間之後發現機會唔多,正計劃轉行嘅時候,就遇到導演麥曦茵搵我拍電影《DIVA華麗之後》,不過講到事業真係算有起色,要到林超賢搵我拍電影《破風》嘞!」

林超賢的情意結

能夠獲得一手令張家輝連奪7個大獎的導演睇中,家樂既緊張亦深感不容有失,惟當時運氣仍差一點點:「訓練咗一段時間,點知去到台灣外景,拍第一個鏡頭就炒車﹗我返到香港就醫,見冇咁痛嘞,即刻捉住助手幫我拍條踩單車片傳畀林導,話佢知我冇事。但佢知我係夾硬嚟,最終戲份梗係刪咗唔少啦。」難怪對於與林導合作,家樂有個難解的情意結:「所以去年佢再次搵我,話覺得自己監製新劇《廉政行動 2019》有角色好適合我,但當時我已答應咗拍無綫一套三、四十集嘅長劇,好明白長劇對我嘅曝光同人氣有保證,但衡量過後,我都係選擇同林導合作。」

不諳水性幾搞出人命

為了報答伯樂,家樂在拍攝過程相當賣命,飛車場面已算小兒科,不諳水性的他竟膽粗粗落水「捉犯」﹕「佢哋問扮演廉署調查員嘅我識唔識游水,我話唔係好叻但識踩水,佢哋就話OK嘞,點知一埋位我係咁將扮演罪犯嘅武師個頭浸落水,搞到對方差啲窒息,幾乎搞出人命,連喺身邊嘅陳瀅亦畀我嘅無情力撞咗個頭埋船身,佢雖然好痛仲好專業,導演叫cut機先嗌出聲。」

今次合作,二人的緋聞傳得甚囂塵上,要多次作出澄清。不過,郎才女貌甚為匹配,說到發展感情,雙方都未有這個打算,緣分似乎仍欠缺一點點。但家樂對陳瀅印象不錯,對她讚不絕口:「呢套劇畀我識咗呢位好朋友。其實我哋係多年前由朋友介紹識嘅,當時我喺無綫餐廳遇上拍緊古裝劇嘅佢,發現佢大情大性,仲要同初見面嘅我講是非,呢個女仔吸引嘅唔止係外表,《廉》劇幾位導演都讚佢夠拚搏、聰明、演出好有heart。」

心願為社會發聲

家樂還有個宏願,希望用綿力幫社會「發聲」﹕「藝人可以用自己嘅影響力,令大家注意某啲問題,好似之前我拍《幸運是我》想大家關注腦退化問題。今次就想話畀大家知,廉潔同公義嘅重要,呢個系列嘅電視劇我由細睇到大,估唔到終於輪到自己有份演出,真係好開心同興奮。」

蘇永康欣賞「夠真」期待合作

入行多年的家樂仍保持赤子之心實屬少見,連前輩蘇永康(阿公)亦大為欣賞。專訪當天家樂於無綫化妝間外遇上阿公,二人閒話家常,阿公向記者說:「我係咁『直』嘅人,都好鍾意佢。嗰日佢錄影《娛樂大家》被玩,即刻由耳仔開始紅到落塊面,表情唔做作,呢樣嘢冇得呃人。」說着說着,阿公表示期待與家樂合作,家樂聞言即細聲「提醒」﹕「其實我同你都有份拍《DIVA華麗之後》,不過好似冇乜對手戲……」心細如塵的他,男女、大小「通殺」,前途無可限量。

髮型:Kenricksiu@fifthsalon 化妝:Khaki Yan

陳瀅
憑電視劇《逆緣》成功彈出。
陳家樂拍《破風》要多謝伯樂林超賢(右)。
陳家樂珍惜所得的機會,並全力以赴。