【陳嘉倩女神形象被毀?】網民鬧爆係雙面人 陳嘉倩否認指控:同過我合作就知

陳嘉倩

一向深得宅男及網民鍾意嘅前無綫新聞主播陳嘉倩,一向好少有負面新聞,不過近日就突然有人喺社交網站鬧爆女神係雙面人!

陳嘉倩自從離開咗無綫之後就做KOL,憑著招牌甜美笑容加上靚樣,繼續大受歡迎。人氣咁強勁當然唔少品牌邀請佢合作啦,而且仲不時獲邀到電視台、電台及網台接受訪問。不過日前就有網民聲稱係代朋友發文話最近公司同一位前無綫新聞主播傾合作,以前已經聽過唔少記者話佢好寸,佢都唔太相信。不過真人見面後,原來佢十問九唔應,約傾嘢最少遲一個鐘。呢位網民話出席記者訪問,呢位前主播都要人等個幾鐘,就算劉德華都唔會咁。最後,呢位網民仲話呢位前主播連做人最簡單嘅禮貌都未識,希望有更多人認識佢嘅性格。雖然帖文冇講到明呢位宅男女神係邊個,但係就有附上加咗馬賽克嘅照片,一睇就知係邊個。

女神俾人鬧,當然即獲得不少網民留言力撐佢,話叫發帖者提供證據,亦有網民指佢係「看圖作文」。不過亦有網民留言話:「合作過幾次,黑面遲到冇禮貌女神」及「根本就是一名扮上菜的,貪慕虛榮的垃圾。」等等。

陳嘉倩對於俾人鬧冇禮貌同遲到,就以短訊回覆傳媒話覺得好莫名其妙,因為平時工作聯絡會交俾助手處理,好少人會直接搵佢傾,佢亦會同助手了解吓。另外,陳嘉倩仲話自己冇約過傾嘢或者約記者遲一個鐘,同過佢合作就知佢係咩人。

究竟呢件事情嘅真相係點,可能只有當事人先知,唔知大家又點睇呢?

陳嘉倩
陳嘉倩
陳嘉倩
陳嘉倩