《降魔的2.0》會唔會開續集?馬國明漏口風...

《降魔的2.0》劇照

無綫熱播劇《降魔的2.0》搵嚟馬國明、黃智雯、胡鴻鈞、劉佩玥、鄧佩儀及譚凱琪等人主演,口碑比上一輯仲要好。劇集唔經唔覺已經進入尾聲,喺今個星期五將會播出大結局。劇情最新就講到海魔Thalassa(譚凱琪飾)已經出現,仲認為馬季(馬國明飾)係天宇嘅轉世,更將馬季同芷若帶到幻海結界裏。風獅爺(C君飾)將古代手帕藏喺芷若嘅手袋,諗住喺危急關頭可以保護芷若,不過芷若不顧一切俾馬季返回現實世界。而馬季為咗救芷若,佢亦打算與海魔一戰。另一邊廂,豪仔(胡鴻鈞飾)慢慢被魔性吞噬,開始無辦法控制自己。為咗阻止豪仔繼續吸食人類嘅靈魂,萊斯(鄧佩儀飾)努力牽制豪仔,並嘗試令佢恢復人性,不過期間萊斯因失温症加缺氧死亡。

《降魔的2.0》舉行記者會

雖然劇集仲未大結局,不過就已經傳出開拍《降魔的3.0》。喺噚日,劇集舉行記者會,一班劇中演員都有出席。男主角馬國明坦言唔捨得,希望可以原班人馬再合作,就算係其他題材嘅劇集都可以。至於會唔會有續集,馬國明就話結局尾段已經埋咗伏線同埋劇本編審已經就緒,不過暫時未知係咪所有人可以再次埋位。另外,喺今輯胡鴻鈞同鄧佩儀有唔少接吻戲,胡鴻鈞就話已向監製明言下一輯要情深吻戲,仲話邊個都得,唔知包唔包括緋聞女友蔡思貝呢?

其實今輯都仲有好多嘢未交代,例如同萊斯交換靈魂嘅魔Mephi(楊證樺飾)仲未出現、小馬仲未成為降魔大師及小馬同芷若可以喺埋一齊等等。

如果劇集真係開拍第三輯,唔知大家會唔會支持呢?