《降魔的》結局為續集鋪路?原來一早設定有三部曲

被網民熱捧為神劇嘅《降魔的》啱啱播完大結局,獲得唔少觀眾同網民好評,連「天然呆」馬明都俾網民力推做視帝。另外,劇集亦成功令金剛、小儀、何遠東及趙永洪等被網民激讚演技而成功彈出。雖然劇集同演員大受歡迎,不過可惜星期日播出嘅大結局就只得24.3點,輸咗俾同樣題材特別嘅《踩過界》26.9點。

大結局講到小馬(馬國明飾)終於肯去降魔,同「魔」決一死戰。最後雖然冇BBQ大團圓結局,不過「魔」就被子彈擊退,而佢亦繼續做降魔俠,都算係皆大歡喜。不過劇集同時亦留下唔少伏線,例如展明(黃子恆飾)前女友(林凱恩飾)現「紅眼」似被魔附身兼懷有展明嘅骨肉、 小馬最後就同「疑似」豪仔喺的士內重遇,open ending到咁,搞到一班網民即刻柯南上身,紛紛話無綫會拍續集。

不過原來呢個只係第一部曲,因為有報導指原來《降魔的》總共有三部曲,啱啱第一部就講馬明成為降魔俠、第二部就會講佢成為隱世降魔高手、第三部就講佢做咗驅魔人之後嘅經歷。  

監製方駿釗仲話開唔開續集就要睇觀眾反應,不過胡鴻鈞最後係 「豪仔」定 「石敢當」就已經落實咗。講返第二輯,如果真係要拍續集,無綫唔想衰嘅話,選角方面就真係要小心啲啦。因為一班網民已經異口同聲指以往無綫開拍嘅續集都會衰收尾,不過最重要嘅係已經有網民講到明唔希望見到黃翠如出現,希望劇組唔好特登硬塞黃翠如入劇組咁話。

無論如何《降魔的》嘅成功反映咗其實觀眾接受程度好高,所以無綫以後嘅題材亦可以更加大膽創新,咁咪唔使再被人話冇誠意、嚟嚟去去都係爭產劇啦!