阿嬌真人騷黐到實 逼老公播種

東方日報
阿嬌今年大把時間對住老公,大可日頭開工拍真人騷,夜晚繼續密密做!

蔡卓妍(阿Sa)和鍾欣潼(阿嬌)鼠年各自定下大計,39歲的阿嬌趕生B,挾老公日夜兼程造人,37歲的阿Sa則預告將展開人生新旅程,問到是否準備結婚?她即大賣關子!

之前已雪卵的阿嬌曾埋怨老公賴弘國未有配合「播種」生B,但她今年盡得天時、地利、人和,皆因除了有3個月拍劇外,其餘9個月將與老公日對夜對加速造人!據知她與老公繼內地節目《爸媽學前班》後,將再次以夫妻檔參加另一個真人騷,有可能在拍攝過程中寓工作於造人!

日前,阿嬌受訪時透露今個新年極忙碌:「生日(1月21日)同老公飛咗去台灣,之後再飛加拿大同阿爸(契爺劉鎮偉)拜年,緊接飛老公家鄉台中同老爺奶奶過年,係婚後第一次跟佢返台中見鄉親父老。」短短幾日就飛勻半個地球,但「跟得夫人」阿嬌絕不嫌辛苦,直言婚後以老公為先:「睇住佢行程表做事,老公啱啱開多咗間診所,要返內地公幹,又要顧住我,我配合佢會容易啲。」

擔心拍劇礙事

問到是否要動用已雪藏的3粒卵子?她坦言已叮囑老公約時間驗身,無奈他很「佛系」:「佢話點解要驗身?約時間直接去做就得。」身旁的阿Sa聽到阿嬌「老公前、老公後」,直指她為另一半有所轉變:「佢以前成日遲到又猶豫不決,依家好準時,又果斷。」阿嬌即大晒幸福:「老公有時為咗遷就我會諗好多,我唔想佢為我煩惱,我要做決定成就件事。」

至於阿Sa與富二代男友石恆聰拍拖逾兩年依然甜蜜,同樣已雪卵的她近年屢傳婚訊,問到會否做鼠年新娘趕生B,實行雙喜臨門?她說:「唔使擔心,有分數!」反而擔心阿嬌趕不及做「鼠媽」:「過埋農曆新年我哋就要飛馬來西亞一齊拍劇,一拍就3個月!」

提到早前揚威「澳門國際電影節及澳門國際電視節頒獎禮」,分別憑電影《非分熟女》獲「電影最佳女主角」及網劇《PTU機動部隊》摘下「劇集最佳女主角獎」,阿Sa慶幸過去的努力:「儲落咗啲嘢,到呢個年紀可以稍為輕鬆啲。(考慮減產?)事實呢幾年係減咗啲,揀自己鍾意嘅工作去做,去吓旅行。」\t

場地:英皇戲院 (尖沙咀iSQUARE)

阿Sa同男友感情穩定,係時候邁入人生新階段。