阮民安遭內地網民攻擊 深夜發文「我很窮,我愛人民幣,但我更愛香港」

阮民安

《逃犯條例》修訂風波已經持續超過兩個月,E-kids成員阮民安(Tommy)多次被拍到現身示威現場及經常喺個人社交網站發表個人感受,以行動支持「反修例」。繼日前喺社交網站上載同做警察堂哥嘅割蓆對話後,俾網民大讚型過余文樂。噚晚又再喺社交網站以 「我很窮,我愛人民幣,但我更愛香港」為題發表長文。

內容係關於抗爭運動,佢今次好大膽咁為香港發聲,仲話當中有人支持佢,亦有人認為佢係無嘢輸,係想博翻身。Tommy就話會身體力行,繼續發聲,不過突然有內地網民去佢老婆Eva嘅微博,話佢哋支持港獨,攻擊佢哋。於是Tommy就同大家分享佢嘅想法同預計嘅損失,佢哋一家四口透過幫唔同產品做宣傳、時裝騷、電視台嘉賓及上內地綜藝節目賺錢生活。而EVA亦有自家品牌,亦將會喺東京嘅一間知名商場正式發佈,佢哋收入都唔錯。但經過多次高調發聲後,佢可能會失去大陸市場,收入亦會大受影響。不過佢覺得同一班手足比,自己嘅損失並唔算得咩,更相信自己唔一定要靠內地先搵到食。Tommy更話雞蛋與高牆,佢一定喺雞蛋呢邊!

阮民安於Facebook發表長文

唔少網民睇完都好支持佢,仲紛紛留言:「而家連周柏豪你都型過佢幾百萬倍。real star !」、「很感動😭男神謝謝你🙇‍♀️you are the best👍」、「Tommy 好真心佩服你,我覺得其他藝人應該以自己為恥 你係榜樣!!」、「支持你👍🏽係錢同良知既天秤上,做出了好多人(特別係公眾人物)都好難做既選擇!大家都要堅持下去✊」、「多謝你,不為五斗米折腰,你品牌推出時,我哋會幫襯,幫你宣傳,自己香港自己救,齊上齊落!」及「Love you 真男神 真男人」等等。

阮民安