阮兒被困結界:執番條命好好彩!

東方日報
阮兒僅穿Bra Top上雪山,為影靚相搏到盡。

無綫小花阮兒最近獲無綫委以重任,以「一腳踢」形式演出個人旅遊節目,在歐洲揸車24日穿州過省,在一次上雪山的崎嶇路途上,誤闖「靈異結界」,幾乎「有入冇出」,她坦言:「執番條命仔好好彩!」

32歲中越混血兒阮兒(Chloe)於荷蘭出世,2006參選港姐後加入無綫,一直多演閒角,直至去年於熱爆劇《金宵大廈》飾演舞女「莎莎」表現亮眼,獲賞識召入綜藝組,拍攝個人旅遊節目《駕到去歐洲》。自小在荷蘭長大的她性格獨立,加上Talk得又Drive得,以「一腳踢」形式拍該節目,資料搜集、寫稿甚至Book車都一手包辦。在歐洲自駕遊24日穿州過省,雖然過程相當辛苦,但她很開心擁有屬於自己的節目。

GPS冇顯示

忙做節目後期工作的Chloe日前受訪,憶述驚險之旅時猶有餘悸,笑言「執番條命仔好好彩」,她說:「中途發生好多事,例如爆胎,我咁大個女未試過自己換胎!有一次去瑞士雪山行錯路,嗰度冇乜車行,覺得有少少靈異,後來睇GPS搵路,竟然冇咗顯示,但就列明20K要行一個鐘頭零8分鐘,個時間有啲奇怪。最後搵咗好耐先落到山,嗰次好危險又多雪,仲要喺崖邊,揸車時真係好驚。事後同朋友傾番,覺得我誤入結界,好彩出得番嚟!」

誤闖打獵區

問到還有甚麼驚險事?她說:「我哋去咗黑森林探險,當時好黑好凍落晒雪,行咗10分鐘,突然聽到有槍聲,原來呢個森林有打獵區,期間突然聽到槍聲,嚇到呢!我仲諗會唔會變成獵物呢?當時唔敢繼續拍,即刻走人」

冇人幫手,阮兒被迫落手換車胎。
有外籍猛男陪拍攝,阮兒可謂艷福不淺。