阮兆祥見房就爆捉人唱K

東方日報
阮兆祥與年輕人合唱周杰倫的歌。

藝人阮兆祥假旺角舉行的演唱會尚有個多月便舉行,日前親身到K場唱「晏K」,為Rundown視察民情。他玩快閃「爆房」捉人合唱,率先爆的是「銀髮唱K族」,見大家唱到興起,他即加把嘴和「姐姐」合唱《夢想號黃包車》,之後與「哥哥」唱陳百強的《喝采》。意猶未盡的他再爆隔籬房,聽見後生仔女唱周杰倫的歌,他零難度唱得投入。

音波功震8層樓

祥仔說:「同『哥哥、姐姐、小朋友』唱歌好好玩,唱歌係宣洩情緒嘅最好方法。」並預告個唱上會與觀眾大合唱,屆時由70年代英文歌唱到時下流行曲,希望透過歌曲勾起回憶。又笑言為特別表演「秘密練兵」:「呢種樂器未見過香港歌手玩過,我想至少學到一首歌,希望喺唔同環節畀到大家驚喜。」

忙於練唱的他自爆發生尷尬事:「有次等緊(車立),鄰居問我係咪開演唱會,我以為佢睇到廣告,點知佢話『唔係,係我聽到你練歌』,最難為情係對方同我屋企相隔8層樓距離,我啲音波功穿透8層樓水泥,好彩冇投訴我,仲讚我愈唱愈好添。」場地:旺角中心Neway

阮兆祥預告演唱會有特別表演。
一入K房,阮兆祥即被「哥哥姐姐」捉着合照。