關智斌又喊又笑 軒仔送抱:愛已昇華

東方日報
Kenny自摸起舞。

入行16年的歌手關智斌(Kenny)如願單飛舉行紅館個唱,除了好兄弟張致恒冇影外,同公司的紅星排隊現身給力,其中集氣成功的「相敬如斌」環節最為精彩,跟嘉賓張敬軒互撐互窒,連「心邪」禮物都擺上台,盛情感動到Kenny又笑又喊。

其實前晚的紅館騷本屬「BOYZ」的演唱會,但受成員張致恒(Steven)衰偷食五女的負面新聞所累而取消,後改由Kenny單拖上陣,舉行一連兩場《KENNY is BORN 關智斌演唱會》。前晚頭場雖未見Steven「負荊請罪」,但有多年「密友」張敬軒獻身,可觀性同樣爆錶。當Kenny邊吹色士風邊唱出《分手不要太悲哀》時,軒仔彈琴和奏合唱,二人黑白配造型襯到絕,軒仔說:「歡迎嚟到『相敬如斌』演唱會。」鞠躬及攬攬後,Kenny說:「我想講兩句,平時你講嘢我都冇得講。」軒仔即謂:「咩平時呀?」期間觀眾大叫「咀嘴」及「結婚」,二人扮聾未有理會。

送煉奶叫人咪心邪

軒仔當眾笑Kenny是慳仔,中秋節做嘉賓竟「百冇」:「老毛(利是)都冇封,平時做嘉賓間房有啲生果同燒肉,但今次乜都冇。」雖一邊嫌連「毛」都冇條,但軒仔仍豪送心意「大禮」,其巨型果籃裝有兩枝貼住「KK」的膏狀物體,軒仔叫大家勿心邪:「煉奶嚟,Kenny Kwan吖嘛,好彩你唔係姓容(否則變KY),識笑嗰啲全部都心邪。」隨即拿出一條又長又有毛的物體,他說:「呢支係鮮淮山,滋陰補腎,呢啲唔係毛,係根,攞番去食。」再解釋送菠蘿的寓意:「第一次見Kenny有波又有籮。」最後還有火龍果,軒仔自誇:「即係好似我咁有益,食咗。」二人再合唱一曲《笑忘書》,一度眼濕濕,唱完又再抱抱。

軒仔感觸說得知Kenny北上發展與容祖兒開個唱一樣是「攞條命較飛」,續謂人生有很多愛是可以不斷昇華:「好似今晚咁,大家將呢份愛化做對Kenny嘅支持。」而Kenny於騷上亦似回應軒仔,表示個唱令他想到曾經共同拚命的朋友:「當仲有人喺你身邊支持,一定要好好珍惜,今晚我永世難忘。」當唱出軒仔為他作曲的《預言書》時,更喊到唱不下去。

祖兒大讚Sexy Body

而軒仔出場前,Kenny於快歌環節騷哥利,數度自摸下身又露麒麟臂,更忘我扯下背心赤裸上身。至於早前膝蓋勞損的大師姐容祖兒竟穿高跟鞋任嘉賓,期間多度抽Kenny水,先摸胸肌,更笑說:「就算我剩番一隻腳都會彈上嚟。」又讚對方Sexy,當摸到其腹肌時更大叫好硬:「好似石春咁實!識唔識震O架?(指胸肌)」不過笑他肚臍窿好黑,全場大笑。

<!--AD--><div class="footerAds clear">第一手消息請下載on.cc東網<a href="http://itunes.apple.com/hk/app/id349812998?mt=8" target="_top">iPhone/</a><a href="http://itunes.apple.com/hk/app/id387862928?mt=8" target="_top">iPad/</a><a href="http://market.android.com/details?id=com.news.on" target="_top">Android/</a></div><!--/AD-->

張敬軒甫現身已全場起哄,二人一攬,更是尖叫聲拆天!
祖兒愈摸愈落,Kenny即時O嘴!