【闊別2年半】《愛·回家之開心速遞》「風少」陳浚霆回歸劇組

陳浚霆

無綫處境劇《愛·回家之開心速遞》自播出以嚟,收視及口碑都好過唔少重頭劇集,唔少角色仲深入民心,深得觀眾喜愛。劇集唔經唔覺已經播出超過3年,有唔少劇中演員離開及加入劇組,而離開再返回劇組都有,例如有龔燁(張景淳飾),Venus(鄺潔楹飾)及雷珍妮(陳偉琪飾)等等,最新仲有飾演大龍生私生子龍璟風「風少」嘅陳浚霆。

陳浚霆係《愛·回家之開心速遞》早期嘅主要演員,佢喺劇中飾演嘅風少,遇上車禍嗰一刻俾熊樹仁(單立文飾)影低咗,之後佢嘅靈魂就寄居喺相機入面,仲將佢帶埋返屋企。熊家嘅人初頭對佢非常反感,仲諗辦法趕走佢,不過之後慢慢接受,仲當佢係熊家嘅一份子。不過因為約滿嘅關係,佢喺第130集後被消失。之後大龍生(羅樂林飾)曾經交代過風少已經醒返,不過就唔記得晒熊家,仲去咗美國休養。

陳浚霆已經返回無綫,有指佢已經開始《愛‧回家之開心速遞》嘅拍攝工作,佢將會以龍璟風身份回歸,不過就未知佢係客串定係固定角色。

《愛·回家之開心速遞》劇照
《愛·回家之開心速遞》劇照
陳浚霆